კოალიცია ცვლილებებისთვის ლიდერმა, ნიკა გვარამიამ 8-თვიანი პატიმრობის შემდეგ, რუსთავის 12-ე დაწესებულება დატოვა.

ჟურნალისტებთან საუბრისას ოპოზიციონერმა პოლიტიკოსმა ჟურნალისტებთან საუბრისას თქვა, რომ საპატიმროებში მყოფი თანამებროძოლების გარეშე "გამარჯვება ძალიან გაგვიჭირდება, ამიტომ ძალიან მალე ისინი უნდა გამოვიყვანოთ საპატიმრობიდან.

"შერეული ემოციები მაქვს. რა თქმა უნდა, ყველას ნახვა მიხარია. პირველ რიგში, ჩემი ცოლ-შვილის, მაგრამ უხერხულად ვგრძნობ თავს, რომ არ დაგიმალოთ, რომ ადამიანები იქ რჩებიან კიდევ. არა მხოლოდ ამ ციხეში — აგერ გვერდით ქალთა ციხეში. უამრავი ადამიანი გლდანის ციხეში, რუსთავის ციხეში კიდევ — საბა. უხერხულობა მალე გარდაიქმნება იმათ, რომ ბოლომდე ვიბრძოლებ მათ აქედან გამოსაყვანად. ესე ვგრძნობთ თავს ყველანი — მორალური თვალსაზრისითაც ნაკლოვანად, მაგრამ მთავარი ის არის, რომ მათი შემართება, ძალა და ენერგია გვაკლია. აქ არის ნიკა — ჩვენი პარტიის თავმჯდომარე, გვერდით ელენე, მიშაა აქ, მურთაზია, ხაბე, რა ვიცი, ბევრი — არ მინდა ვინმე გამომრჩეს. მზია ბრმავდება გვერდით, ქალთა ციხეში. საბა აწამეს, ისიც რუსთავშია.

უამრავი ბიჭი თუ ხნიერი ადამიანი ზის ბრძოლისთვის ციხეში, საკუთარი სამშობლოს სიყვარულისთვის. ეს ქვეყანა ვერასდროს ვერ იქნება ისეთი, ვიდრე მათ დაჭერამდე იყო — ეს გამორიცხული ამბავია. ოღონდ, ყველამ უნდა ვიცოდეთ, რომ ამ ხალხის გარეშეც გამარჯვება ძალიან გაგვიჭირდება, თუ საერთოდ შესაძლებელია. ამიტომ ძალიან მალე ისინი უნდა გამოვიყვანოთ აქედან.

ჩემთვის ყველაზე მეტად მნიშვნელოვანია სიტყვების შინაარსი.მე ვიცი ერთი რამ — ერთად უნდა გვხედავდნენ, ერთად უნდა ვმუშაობდეთ და ერთად უნდა მოვიტანოთ ეს შედეგი. ყბადაღებულ სიტყვა "ერთობას" არ ვიხმარ. მე არ ვიცი ამის უკან ვინ, როგორ, რას მოიაზრებს", — თქვა გვარამიამ.

მან რუსთავის მე-12 ციხეში მყოფ ოცნების ყოფილ მაღალჩინოსნებზეც ისაუბრა და მათაც პოლიპატიმრები" უწოდა.

"აქ [ციხეში] ვინც ქოცები არიან ახლა, თუ უკვე აღარ არიან ქოცები, მაგრამ მათი ყოფილი თანამდებობის პირები, მე ამ ხალხს განვიხილავ პოლიტიკურ პატიმრებად. იმიტომ, რომ პოლიტიკური პატიმრობა იზომება არა იმით, ადამიანმა ჩაიდინა თუ არა ეს ქმედება, ან ჩვენ გვგონია, რომ ჩაიდინა, თუ არ ჩაიდინა. პოლიტიკური პატიმრობის მთავარი საზომი არის ის, რომ ადამიანს არ ღირსებია და ამ ხელისუფლების პირობებში, არც ეღირსება თავისუფალი სასამართლო. აქ მსხდომ ქოცებსაც არ ღირსებიათ თავისუფალი სასამართლო და არც ეღირსებათ, ვიდრე ქოცები არიან ხელისუფლებაში", — განაცხადა კოალიცია ცვლილებებისთვის ლიდერმა, ნიკა გვარამიამ საპატიმროს დატოვების შემდეგ.

გვარამია 2025 წლის ივლისში წულუკიანის ე.წ. საგამოძიებო კომისიაზე გამოუცხადებლობის გამო დააკავეს. მოსამართლე ჯვებე ნაჭყებიამ მას 8 თვიანი პატიმრობა მიუსაჯა.

ნიკა გვარამიას ბრალი სისხლის სამართლის კოდექსის 349-ე მუხლით ჰქონდა წარდგენილი, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს.

წულუკიანის ე.წ. კომისიაზე გამოუცხადებლობისთვის დაკავებული ოპოზიციონერი პოლიტიკოსების ნაწილმა, მათ შორის: ზურაბ გირჩი ჯაფარიძემ, გიორგი ვაშაძემ, მამუკა ხაზარაძემ, ბადრი ჯაფარიძემ, გივი თარგამაძემ საპატიმროები უკვე დატოვეს. ამავე ბრალდებით სასჯელს ამ დრომდე იხდიან: ნიკა მელია და ირაკლი ოქრუაშვილი.