"შეწყალებული 159 ადამიანის დაუყოვნებლივ გასათავისუფლებლად მზაობა თუ არ არსებობდა — ეს უპასუხისმგებლობაა, თუ არსებობდა და არ უშვებენ — სადიზმი", — ამის შესახებ სოციალურ ქსელში ადვოკატი ომარ ფურცელაძე წერს. მისი თქმით, ის, რაც ნათლისღების დღესასწაულზე პატიმრების შეწყალებასთან დაკავშირებით მოხდა, ამაში არაფერი "ჰუმანური და ქრისტიანული" არ არის.

"საქართველოში საორიენტაციოდ 10 000 მდე პატიმარია. მათ უკან მინიმუმ ამდენივე ოჯახი.
ყოველთვის ყველა ელოდება შეწყალებას.

19 იანვრის ღამემდე შესაწყალებელ პირთა სია თუ არ არსებობდა — ეს უპასუხისმგებლობაა, თუ არსებობდა და არ განაცხადეს — სადიზმი.

შეწყალებული 159 ადამიანის დაუყოვნებლივ გასათავისუფლებლად მზაობა თუ არ არსებობდა — ეს უპასუხისმგებლობაა, თუ არსებობდა და არ უშვებენ — სადიზმი.
შეწყალება ჰუმანური აქტია.

ხვალ რა არგუმენტი და ახსნაც არ უნდა მოისმინოთ, არაფერი ჰუმანური, ქრისტიანული და ქართული დღეს არ მომხდარა", — წერს სოციალურ ქსელში ადვოკატი ომარ ფურცელაძე.

შეგახსენებთ, რომ ნათლისღების დღესასწაულთან დაკავშირებით პატიმრების, მათ შორის სინდისის პატიმრების, შეწყალებას საზოგადოება გუშინ დილიდან ელის.

ქართული ოცნების დანიშნული პრეზიდენტის, მიხეილ ყაველაშვილის ადმინისტრაციამ 159 მსჯავრდებული პირის შეწყალების შესახებ ინფორმაცია გვიან ღამით, 22:30 საათზე გაავრცელა.

"საქართველოს პრეზიდენტის მიერ მისთვის კონსტიტუციით მინიჭებული ექსკლუზიური უფლებამოსილების გამოყენება ეფუძნება ჰუმანიზმის პრინციპს და სახელმწიფო ინტერესს", — წერია გავრცელებულ ინფორმაციაში.

ამ დრომდე უცნობია არიან თუ არა შეწყალებულთა შორის სინდისის პატიმრები.