ადამიანის ჯანმრთელობისთვის ნებისმიერი ტემპერატურის წყლის მიღება სასარგებლოა, იქნება ეს ცივი, თუ — ცხელი. წყალი ორგანიზმს გამართულად ფუნქციონირებაში ეხმარება და დეჰიდრატაციისგან იცავს. თუმცა, ჰიდრატაციის ზოგად სარგებელთან ერთად, არსებობს მოსაზრება, რომ ცხელი წყლის მიღებას დამატებითი დადებითი ეფექტებიც აქვს.

საჭმლის მომნელებელი სისტემის გაუმჯობესება

სხეულში სითხის ნაკლებობა ხშირად ყაბზობას იწვევს. როდესაც ადამიანი საკმარის წყალს არ სვამს, წვრილი ნაწლავი საკვებიდან და სასმლიდან მიღებული წყლის შეწოვას ცდილობს, რაც იწვევს გაუწყლოებას და ართულებს დეფეკაციის პროცესს.

ქრონიკულმა დეჰიდრატაციამ შეიძლება მუდმივი ყაბზობა გამოიწვიოს, რაც თავის მხრივ ტკივილს, მუცლის შებერილობასა და ჰემოროიდულ დაავადებას — ბუასილს განაპირობებს.

ზოგიერთი კვლევის თანახმად, ერთი ჭიქა ცხელი წყალი ან სხვა თბილი სასმელი ამშვიდებს კუჭს და ხელს უწყობს შეკრულობისგან გათავისუფლებას.

სისხლის მიმოქცევის გაუმჯობესება

ცხელი წყალი ვაზოდილატატორია, რაც იმას ნიშნავს, რომ ის სისხლძარღვებს აფართოებს და სისხლის მიმოქცევას აუმჯობესებს.

სითბოს თერაპიას, მაგალითად, თბილი წყლის ბოთლებს ან ცხელ აბაზანებს ხშირად იყენებენ სისხლის მიმოქცევის გაუმჯობესებისთვის. ამისთვის ნებისმიერი სახის ჰიდრატაცია სასარგებლოა, მათ შორის, ცივი წყლითაც, თუმცა ცხელი წყალი შეიძლება კიდევ უფრო მეტად დაეხმაროს სისხლის მოძრაობას.

კანკალის შემცირება

კანკალი სხეულის ბუნებრივი რეაქციაა სიცივეზე. 2017 წელს ჩატარებულმა კვლევამ დაადასტურა, რომ თბილი სასმლის მიღება სხეულს ათბობს და კანკალს ამცირებს.

თბილი სითხის მიღებისას ორგანიზმს ნაკლები ენერგიის დახარჯვა უწევს სხეულის ტემპერატურის შესანარჩუნებლად. ცხელი წყლის დალევა განსაკუთრებით სასარგებლოა მათთვის, ვისაც ხშირად უწევს ცივ გარემოში ყოფნა.

გაციების სიმპტომების შემსუბუქება

გაციების დროს ხშირია ყელის ტკივილი და ცხვირის გაჭედვა. თბილი სითხეების მიღება ამშვიდებს და ატენიანებს ყელს, ანთებით პროცესს კი — ამცირებს. გარდა ამისა, ცხელი სასმელები ხელს უწყობს ლორწოს გათხელებას, რაც ეხმარება სასუნთქი გზების გათავისუფლებას.

შესაძლო რისკები

ცხელი წყლის მიღებისას მთავარი რისკი დამწვრობაა. წყალი, რომელიც ხელით შეხებისას ნორმალური ტემპერატურის გვეჩვენება, შეიძლება ენისა და ყელისთვის ზედმეტად ცხელი აღმოჩნდეს. ამიტომ ჯობს, რომ მდუღარე წყლის მიღებას მოერიდოთ და სანამ თამამად დალევთ ცხელ სითხეს, ფრთხილად გასინჯოთ მისი ტემპერატურა.

ასევე გაითვალისწინეთ: მიუხედავად იმისა, რომ ჩაი და ყავაც ცხელი სასმელებია და ბევრი იმ დადებითი თვისებით ხასიათდებიან, რომლებიც ზემოთ აღვნიშნეთ, ისინი წყალს ვერ შეცვლიან. კოფეინიანი ჩაისა და ყავის ჭარბმა მიღებამ შეიძლება ნერვული აგზნებადობა ან შფოთვა გამოიწვიოს.