ამერიკის შეერტებული შტატების მიერ დაკავებული ვენესუელის პრეზიდენტი ნიკოლას მადურო ნარკოტიკებთან დაკავშირებულ ბრალდებებზე თავს უდანაშაულოდ მიიჩნევს. ამის შესახებ მან ნიუ იორკში გამართულ სასამართლო პროცესზე განაცხადა. ინფორმაციას France 24 ავრცელებს.

"მე უდანაშაულო ვარ. მე არ ვარ დამნაშავე. მე წესიერი ადამიანი ვარ. მე კვლავ ჩემი ქვეყნის პრეზიდენტი ვარ," — თქვა 63 წლის მადურომ თარჯიმნის დახმარებით, სანამ მანჰეტენის ფედერალური სასამართლოს მოსამართლე ალვინ ჰელერშტაინი სიტყვას არ გააწყვეტინებდა.

მადუროს მეუღლემ, სილია ფლორესმაც უდანაშაულოდ ცნო თავი. სასამართლოს მომდევნო სხდომა 17 მარტს ჩაინიშნა.

ნახევარსაათიანი მოსმენის წინ სასამართლოს შენობის გარეთ ათობით დემონსტრანტი შეიკრიბა — როგორც მადუროს მხარდამჭერები, ისე მისი მოწინააღმდეგეები.

რამდენიმე საათის შემდეგ, კარაკასში, მადუროს ვიცეპრეზიდენტი დელსი როდრიგესი ვენესუელის დროებით პრეზიდენტად დაამტკიცეს. მან მადუროს მიმართ მხარდაჭერის სიტყვები წარმოთქვა, თუმცა არ გაუკეთებია მინიშნება იმის შესახებ, რომ შეერთებული შტატების ნაბიჯს შეეწინააღმდეგებოდა.

ცნობისთვის, მადუროს ბრალად ედება კოკაინის ტრეფიკინგის ქსელის ხელმძღვანელობა, რომელიც ძალადობრივ ჯგუფებთან, მათ შორის მექსიკის სინალოას და ზეტას კარტელებთან, კოლუმბიის FARC-ის მეამბოხეებთან და ვენესუელის კრიმინალურ დაჯგუფება "ტრენ დე არაგუასთან" თანამშრომლობდა.

მას ოთხი სისხლის სამართლის ბრალდება აქვს წაყენებული: ნარკოტერორიზმი, კოკაინის იმპორტის მიზნით შეთქმულება, ასევე ავტომატური იარაღისა და დამანგრეველი მოწყობილობების ფლობა.

მადურო წლებია უარყოფს ამ ბრალდებებს და აცხადებს, რომ ისინი ვენესუელის მდიდარი ნავთობის რესურსების ხელში ჩაგდებისკენ მიმართული იმპერიალისტური გეგმების საფარია.

შეგახსენებთ, აშშ-ს პრეზიდენტმა დონალდ ტრამპმა 3 იანვარს განაცხადა, რომ ვენესუელის პრეზიდენტი ნიკოლას მადურო და მისი მეუღლე დააკავეს და ქვეყნიდან ვერტმფრენით აშშ-ში გადმოიყვანეს მას შემდეგ, რაც აშშ-მა კარაკასზე "მასშტაბური დარტყმები" განახორციელა.