აშშ-ის სახელმწიფო დეპარტამენტმა რუსეთის მიმართ მოქმედი მოგზაურობის გაფრთხილება განაახლა. ამის შესახებ ინფორმაციას Fox News ავრცელებს.

არსებული სამოგზაურო რეკომენდაცია ამ კვირაში ცვლილებების გარეშე ხელახლა გამოიცა. სახელმწიფო დეპარტამენტი მიუთითებს მაღალი რისკების მთელ რიგზე, მათ შორის ტერორიზმზე, უსამართლო დაკავებებზე და "ადგილობრივი კანონების თვითნებურ აღსრულებაზე".

გაფრთხილება რუსეთისა და უკრაინის თითქმის ოთხწლიანი ომის ფონზე ვრცელდება.

აშშ-ის ოფიციალური პირები აღნიშნავენ, რომ მოსკოვში საელჩოს თანამშრომელთა რაოდენობის შემცირებისა და რუსეთის ტერიტორიაზე საკონსულოების საქმიანობის შეჩერების გამო, ამერიკის მოქალაქეებისთვის დახმარების გაწევის შესაძლებლობა მნიშვნელოვნად არის შეზღუდული. გაფრთხილებაში ასევე ნათქვამია, რომ არსებობს პრეცედენტები, როდესაც რუსეთის უსაფრთხოების სამსახურებმა ამერიკელები ცრუ ბრალდებებით დააკავეს.

"აშშ-ის მოქალაქეებმა დაუყოვნებლივ უნდა დატოვონ რუსეთი... რუსი ოფიციალური პირები ხშირად უსაფუძვლოდ კითხავენ და ემუქრებიან აშშ-ის მოქალაქეებს... მათ [ამერიკელებს] უარი უთხრეს სამართლიან მოპყრობაზე და სარწმუნო მტკიცებულებების გარეშე გაასამართლეს", — ნათქვამია გაფრთხილებაში.

მოგზაურებს ურჩევენ, თავიდან აიცილონ ქვეყანაში ელექტრონული მოწყობილობების შეტანა. მათი განმარტებით, უნდა ჩაითვალოს, რომ ყველა ელექტრონული კომუნიკაცია და მოწყობილობა კონტროლის ქვეშაა.

სანქციების გამო, ამერიკული სადებეტო და საკრედიტო ბარათები რუსეთში აღარ მუშაობს და "აშშ-დან რუსეთში ელექტრონული ფულადი გადარიცხვები თითქმის შეუძლებელია," — აღნიშნულია დოკუმენტში.

გაფრთხილებაში ნათქვამია, რომ ტურისტები, რომლებიც მაინც გადაწყვეტენ რუსეთში გამგზავრებას, უნდა იყვნენ "მზად გაურკვეველი ვადით დაკავების შესაძლებლობისთვის".

"გამოდით ყველა სოციალური ქსელის ანგარიშიდან და რუსეთში ყოფნისას არ შეხვიდეთ თქვენს სოციალურ მედია ანგარიშებზე...მოამზადეთ ანდერძი და განსაზღვრეთ შესაბამისი სადაზღვევო ბენეფიციარები ან მინდობილობა,"— ასევე წერია რეკომენდაციაში.