საგარეო საქმეთა სამინისტრო განცხადებით, საქართველო მხარს უჭერს ესპანეთის სამეფოს სუვერენიტეტს და ტერიტორიულ მთლიანობას და მიუღებლად მიიჩნევს დამოუკიდებლობის ცალმხრივად გამოცხადებას.

"იმედს გამოვთქვამთ, რომ კრიზისი დარეგულირდება დიალოგის გზით და ესპანეთის ხელისუფლება შეძლებს კონსტიტუციური წესრიგის დაცვას და ამით გარანტირებული იქნება ყველა მოქალაქის უფლებები და თავისუფლებები", - ნათქვამია განცხადებაში.

1-ლ ოქტომბერს ჩატარებული კატალონიის დამოუკიდებლობის რეფერენდუმი, რომელსაც არ აღიარებს მადრიდი და არც ევროკავშირი, ჯერ კიდევ ჩატარებამდე გამოაცხადა არაკონსტიტუციურად ესპანეთის საკონსტიტუციო სასამართლომ. ესპანეთის ერთიანობას დაუჭირეს მხარი გერმანიამ და საფრანგეთმა.

ესპანეთის მიერ არაღიარებული რეფერენდუმის შედეგების მიხედვით, კატალონიელების 90-მა პროცენტმა დამოუკიდებლობას დაუჭირა მხარი. ამავე დროს, მოქალაქეების აქტივობა 43 პროცენტს შეადგენდა.

კატალონიის ლიდერს, კარლეს პუჩდემონის კატალონიის დამოუკიდებლობა 11 ოქტომბერს უნდა გამოეცხადებინა, მაგრამ ამის გადადება მოითხოვა, რათა ესპანეთიდან გამოყოფაზე მადრიდთან ოფიციალური დიალოგი დაიწყოს. ესპანეთის მთავრობამ პუჩდემონის მიერ დამოუკიდებლობის ხელმოწერილი დოკუმენტი არ მიიღო და მედიაციისკენ მოწოდებებიც უგულვებელყო.