იუსტიციის უმაღლესი საბჭოს წევრმა, დიმიტრი გვრიტიშვილმა დაადასტურა, რომ სასამართლო დარბაზში ჟურნალისტებს ტელეფონების შეტანა აეკრძალებათ. ამის შესახებ მედიის წარმომადგენლებს ეჭვი მას შემდეგ გაუჩნდათ, რაც 7 ნოემბერს, თბილისის საქალაქო სასამართლოში "ნივთების სათავსო" კარადა დაამონტაჟეს, რომელშიც 960 ადგილია, თითოეული სათავსოს კარი დანომრილია და ჩამკეტით იკეტება.

იუსტიციის უმაღლესი საბჭოს წევრმა, დიმიტრი გვრიტიშვილმა კითხვაზე, შეეხება თუ არა სასამართლო პროცესებზე მობილურის შეტანის აკრძალვა ჟურნალისტებს ჟურნალისტებს უთხრა, რომ "რეგულაცია ყველას ეხება" და ეს რეგულაცია მხოლოდ ჟურნალისტებისთვის არაა.

მისი განმარტებით, ოცნებამ აღნიშნული კანონმდებლობა ჯერ კიდევ ივნისში მიიღო — აკრძალვის მიუხედავად სოციალურ ქსელში მაინც ვრცელდებოდა სასამართლო პროცესებიდან ფარულად გადაღებული კადრები.

"საქართველოს პარლამენტმა მიიღო საკანონმდებლო აქტი, რომლითაც ფოტო-ვიდეოგადაღება, აუდიოჩაწერა და ტრანსლაცია აკრძალა სასამართლო სხდომის დარბაზებში იმ ლეგიტიმური მიზნის მისაღწევად, რასაც ჰქვია მართლმსაჯულების სათანადოდ განხორციელება.

კატეგორიები და გამონაკლისები ჟურნალისტების მიმართ დაწესებული არ არის. მიუხედავად იმისა, ყველამ იცოდა, რომ გადაღება იყო აკრძალული, ფარულად გადაღებული ვიდეოები ვრცელდებოდა.

სათავსო არის იმისთვის, რომ კანონის აღსრულების მიზნით ეს ტელეფონები ხომ უნდა შეინახოს სასამართლომ და მერე, როცა სხდომა დასრულდება, დაუბრუნოს მფლობელს, ამიტომაცაა ეს სათავსო… ამაში რამე განსაკუთრებულს ვერ ვხედავ," — განაცხადა გვრიტიშვილმა.

აღნიშნულ აკრძალვებთან დაკავშირებით ადვოკატთა ასოციაციის თავმჯდომარემ, დავით ასათიანმა განაცხადა, რომ სასამართლო პროცესზე მობილურების ჩამორთმევა ადვოკატებსა და პროკურორებს არ შეეხებათ. გვრიტიშვილმა აღნიშნულ განცხადებაზე დასძინა, რომ "არ იცის ასათიანი" ვინ დაამშვიდა და აკრძალვა უკლებლივ ყველას შეეხება.

"რეგულაცია არის ისეთი, რომ ეხება ყველას. ხო ნუ არ ვიცი, თუ არ სრულდება, ეს შეიძლება ვთქვათ გახდეს მსჯელობის საგანი, მაგრამ თქვენთვის ცნობილია, რომ რეგულაცია მოქმედებს და ნებისმიერი ტექნიკური საშუალებების შეტანა არ უნდა დაიშვას.

[ასათიანმა] რატომ დაამშვიდა [ადვოკატები] არ ვიცი და რატომ განმარტავს, ეს მას ჰკითხეთ. კანონმდებლობით ასეა. ჩემთვის უცნობია, ვინ რა მოაგვარა. მე გიხსნით როგორც იურისტი და მოსამართლე, რეგულაციის შინაარსს, რომ ის მიემართება ყველას, გამონაკლისის გარეშე. ვიღაცა თუ რაღაც ცრუ ინფორმაციას ავრცელებს, ეს მისი პრობლემაა," — თქვა გვრიტიშვილმა.

შემდეგ ჟურნალისტებმა გვრიტიშვილს ჰკითხეს, რის მიხედვით იღებს საბჭო გადაწყვეტილებას, რომელი სასამართლო პროცესების გადაღების უფლება მისცეს მედიის წარმომადგენლებს. ჟურნალისტებმა გვრიტიშვილს შეახსენეს, რომ ფოტო-ვიდეოგადაღების აკრძალვის შემდეგ მხოლოდ ერთი პრეცედენტი იყო, როდესაც საბჭომ საზოგადოებრივ მაუწყებელს გიორგი ბაჩიაშვილის სასამართლო სხდომის გადაღების უფლება მისცა. გვრიტიშვილმა განაცხადა, რომ "შესაძლებელია, განცხადებას რამე ფორმალური პრობლემა ჰქონდა, რის გამოც საბჭოს სხდომაზე არ იქნა განსახილველად დაშვებული. მე როგორც ვიცი, რამე კონკრეტული ფორმა საბჭოში შემუშავებული არ არის. შინაარსობრივად და სამართლებრივად გამართული უნდა იყოს მომართვა, რის შემდეგაც საბჭო იმსჯელებს ამ საკითხზე და მიიღებს გადაწყვეტილებას".

კითხვაზე, თუ როგორ შეძლებენ მედიის წარმომადგენლები სასამართლო პროცესების გაშუქებას, თუ არც საბჭო აძლევს მათ ოფიციალურად გადაღების უფლებას და სასამართლო პროცესებზე მობილურის შეტანაც აიკრძალება, გვრიტიშვილმა უპასუხა, რომ "კანონი ასეთია".

"კანონი არის ასეთი, მე ვარ მოსამართლე, სასამართლო ემორჩილება კანონს, მე ამ კანონში პრობლემას ვერ ვხედავ, მის კონსტიტუციურობაშიც ვერ ვხედავ პრობლემას, ვინმე თუ ხედავს, შეუძლია, მიმართოს საკონსტიტუციო სასამართლოს.

კანონი არის ასეთი, მე ვარ მოსამართლე, სასამართლო ემორჩილება კანონს, მე ამ კანონში პრობლემას ვერ ვხედავ, მის კონსტიტუციურობაშიც ვერ ვხედავ პრობლემას, ვინმე თუ ხედავს, შეუძლია, მიმართოს საკონსტიტუციო სასამართლოს," — თქვა მან.

შეგახსენებთ, იუსტიციის უმაღლესი საბჭოს 17 ივლისის დადგენილებაში ვკითხულობთ, რომ "სასამართლოს მანდატურმა სასამართლოს ეზოში და შენობაში პირის შესვლისას, ვიზუალურად უნდა შეამოწმოს, ხომ არ შეაქვს პირს სასამართლოში ფოტო-, კინო-, ვიდეოგადაღების, ტრანსლაციის და აუდიოჩაწერის ფუნქციის მქონე ნებისმიერი ტექნიკური საშუალება (გარდა მობილური ტელეფონისა)".

რაც შეეხება სასამართლო დარბაზს, დადგენილებაში ვკითხულობთ, რომ სასამართლოს მანდატურმა არ უნდა დაუშვას პირის მიერ ნებისმიერი ტექნიკური საშუალების შეტანა, მათ შორის მობილური ტელეფონისა. მანდატურს ასევე უფლება აქვს პირს ჩამოართვას ნივთი, რომელიც "ეჭვს ბადებს", რომ ტრანსლაციისა და გადაღების ფუნქცია აქვს.