ევროკავშირსა და საქართველოს შორის ადამიანის უფლებების შესახებ ყოველწლიური დიალოგის შეხვედრა, რომელი 21 ნოემბერს ბრიუსელში უნდა ჩატარებულიყო, გადაიდო.

დღეს მედიაში გავრცელდა ინფორმაცია იმის შესახებ, რომ ბრიუსელში დაგეგმილი დიალოგის გადადების მიზეზი დელეგაციის შემადგენლობაში სანქცირებული პირი, კერძოდ ოცნების ხელისუფლების შს მინისტრის მოადგილე, ალექსანდრე დარახველიძე გახდა.

დღეს მან ჟურნალისტებთან საუბრისას დაადასტურა, რომ იმ დელეგაციის წევრი იყო, რომელიც ბრიუსელში ევროკავშირის ადამიანის უფლებათა დიალოგს უნდა დასწრებოდა.

"დაგეგმილი იყო კონკრეტული დიალოგი ადამიანის უფლებათა დაცვის საკითხებთან დაკავშირებით. აქ სანქცირებასთან საუბარი უადგილოა. მათ მოგვაწოდეს კონკრეტული საკითხები რაზეც უნდა ყოფილიყო დიალოგი. შესაბამისად, განისაზღვრა კონკრეტული უწყებები, რომელსაც კითხვებზე, რომელზეც მათი მხრიდან იყო დასმული, უნდა გაეცათ ფაქტებზე და მტკიცებულებებზე დაფუძნებული ამომწურავი პასუხები. სამწუხაროდ, როგორც ჩვენთვის ცნობილია, მათ თავად აღარ ისურვეს ამ პასუხების მოსმენა. შესაბამისად, გადაიდო ეს დიალოგი.

გაუგებარია რა მიზეზით მიიღეს ეს გადაწყვეტილება. არანაირი ახსნა მათ არ მოუწოდებიათ. იყო საუბარი იმაზე, რომ ისინი მზად არიან გადაიდოს ეს დიალოგი და ჩვენ ასე მოგვეწოდა ეს პოზიცია. .. ასეთი მიზეზი [ის, რომ დელეგაციაში სანქცირებული პირი იყო] ოფიციალურად არავის მოუწოდებია. რაც შეეხება სანქცირების საკითხს, ევროკავშირის მიერ საქართველოს არც ერთი მოქალაქე არ არის", — განაცხადა ალექსანდრე დარხველიძემ.

ადამიანის უფლებათა დაცვის საკითხებზე საქართველო-ევროკავშირის დიალოგის გადადებას ოცნების ხელისუფლების საგარეო უწყებაც გამოეხმაურა. მათი თქმით, შეხვედრა ევროკავშირის მხარის გადაწყვეტილებით "მიუღებელი და გაუმართლებელი საბაბით" გადაიდო. გავრცელებულ განცხადებაში უწყება წერს, რომ ბრიუსელი არ არის მზად მოისმინოს ქართული მხარის არგუმენტირებული პოზიციები.

ევროკავშირსა და საქართველოს შორის ადამიანის უფლებებისა და დემოკრატიის საკითხებზე დიალოგი 2009 წლიდან ყოველწლიურად ტარდება და პოლიტიკური თანამშრომლობის მნიშვნელოვანი ფორმატია. შეხვედრებზე ადამიანის უფლებების მდგომარეობა ქვეყანაში, დემოკრატიული რეფორმების პროგრესი და სამოქალაქო საზოგადოების რეკომენდაციები განიხილება.

ალექსანდრე დარახველიძე სანქცირებულია ლიეტუვის, ლატვიის, ესტონეთის, ჩეხეთისა და დიდი ბრიტანეთის მიერ. ბალტიის ქვეყნებმა მას სავიზო, ხოლო ბრიტანეთმა ეკონომიკური შეზღუდვები დაუწესა.