ევროკავშირის პროგრამა Erasmus+-ის 2026 წლის გზამკვლევის მიხედვით, საქართველოს ხელისუფლება აღარ იქნება უფლებამოსილი ისარგებლოს ამ გზამკვლევში მოცემული აქტივობებით.

"2024 წლის 19 დეკემბრის საბჭოს დასკვნების შესაბამისად და საქართველოში მიმდინარე პოლიტიკური მოვლენების პასუხად, ევროკავშირმა ხელახლა განიხილა ფინანსური დახმარება, რომელიც უშუალოდ სარგებელს აძლევს საქართველოს ხელისუფლებას. ევროკავშირის განათლებისა და პროფესიული გადამზადების, ახალგაზრდობისა და სპორტის პროგრამის — "Erasmus+"-ის — დამამტკიცებელი 2021 წლის 20 მაისის რეგულაციის (EU) 2021/817-ის 20-ე მუხლის გათვალისწინებით, პროგრამიდან საქართველოს ხელისუფლებისთვის პირდაპირი ფინანსური დახმარება — რაც გულისხმობს ცენტრალურ ხელისუფლებას, ადგილობრივ ორგანოებს, სააგენტოებსა და სახელმწიფო საწარმოებს — აღარ ჩაითვლება კავშირის ინტერესად. შესაბამისად, საქართველოს ხელისუფლება აღარ იქნება უფლებამოსილი, ისარგებლოს ამ გზამკვლევში მოცემული აქტივობებით", — წერია Erasmus+-ის პროგრამის გზამკვლევში.

ცნობისთვის, Erasmus+ არის ევროკავშირის პროგრამა განათლების, ახალგაზრდობისა და სპორტის სფეროებში. 2021-2027 პროგრამის ბიუჯეტი €26.2 მილიარდი ევროთი განისაზღვრება და მის მიზანს სოციალური ჩართულობის, მწვანე და ციფრული განვითარებისა და დემოკრატიულ ცხოვრებაში ახალგაზრდების მონაწილეობის ხელშეწყობა წარმოადგენს.

"Erasmus+-ის დაფინანსების მოპოვება შეუძლიათ განათლების, წვრთნის, ახალგაზრდობისა და სპორტის სფეროში მომუშავე ორგანიზაციებს – სკოლებს, უნივერსიტეტებს, პროფესიული განათლების ცენტრებს, არასამთავრობო ორგანიზაციებსა და ახალგაზრდობის ჯგუფებს. ინდივიდებს (მაგალითად, მოსწავლეებს, მასწავლებლებს ან ახალგაზრდებს) კონკურსში მონაწილეობა ამ ორგანიზაციების მეშვეობით შეეძლებათ.

განაცხადთა უმრავლესობას Erasmus+ პროგრამის ეროვნული სააგენტოები მიიღებენ. ზოგიერთი მიმართულება კი – მაგალითად, ჟან მონეს პარტნიორობები — ევროპის განათლებისა და კულტურის აღმასრულებელი სააგენტოს (EACEA) მიერ იმართება. სრული ინფორმაცია ხელმისაწვდომია Erasmus+ პროგრამის 2026 წლის გზამკვლევში.

საქართველოს წარმომადგენლებს პროგრამის გარკვეულ მიმართულებებში შეუძლიათ მონაწილეობის მიღება, რაც დამოკიდებულია კონკრეტული კრიტერიუმების და პირობების დაკმაყოფილებაზე", — წერია ევროკავშირის აღმოსავლეთ სამეზობლოს მიერ გავრცელებულ პრესრელიზში.

ევროკავშირის აღმოსავლეთ სამეზობლოს ქვეყნებიდან პროგრამასთან ასევე არ არიან ასოცირებული: სომხეთი, აზერბაიჯანი, ბელორუსია, მოლდოვა და უკრაინა.