აქტივისტების ინფორმაციით, წუხელ შსს-მ 9 პირი დააკავა. გავრცელებული ინფორმაციით, დაკავებულთა შორის არიან მარიამ მეყანწიშვილი, სიმონ მახარაძე, დავით გიუნაშვილი, გიორგი ტალახაძე, დავით ღურწკაია, თემურ ქურციკიძე, მიხეილ და გია თოლორაიები, კახა კვაჭანტირაძე.

მარიამ მეყანწიშვილის დედა ტვ პირველთან აცხადებს, რომ მარიამი სახლში, 6 წლის შვილის თვალწინ დააკავეს, გაჩხრიკეს სახლი, იპოვეს რამდენიმე ნიღაბი და 600 ლარი, რომლითაც მარიამ ბინის ქირა უდა გადაეხადა.

გამთენიისას ოზურგეთში 22 წლის სიმონ მახარაძე დააკავეს. სოციალურ ქსელში დაკავებულის ნათესავი ვიდეოს ავრცელებს, სადაც ამბობს, რომ სიმონ მახარაძის დასაკავებლად გამთენიისას "სპეცოპერაცია ჩაატარეს", "მცირეწლოვან ბავშვებს იარაღი დაადეს" და "შინაური ცხოველების მოკვლით დაემუქრნენ".

დაკავებულების შესახებ ოფიციალური ინფორმაცია შსს-ს ჯერ არ გაუვრცელებია.