მოლდოვის საარჩევნო კომისიის ბოლო ცნობებით, მმართველმა პროევროპულმა მოქმედებისა და სოლიდარობის პარტიამ (PAS) გუშინ გამართულ საპარლამენტო არჩევნებში დამაჯერებელი ლიდერობა მოიპოვა, ბიულეტენების 99.78%-ის დათვლის შემდეგ ხმების 50.14% მიიღო.

საერთაშორისო ლიდერები არჩევნების შედეგებს ეხმაურებიან და მოლდოვას პროევროპული გზის არჩევას ულოცავენ.

უკრაინის პრეზიდენტი ვოლოდიმირ ზელენსკი:

"რუსული დივერსია, მუდმივი დეზინფორმაცია — ამ ყველაფერმა შედეგი არ გამოიღო. მნიშვნელოვანია, რომ მოლდოვა ეფექტურად იცავდა თავს საფრთხეებისგან ყველასთან ერთად, ვინც დახმარება გაუწია. ჩვენ ყოველთვის ვუჭერთ მხარს მოლდოვას. გავაგრძელებთ ერთად მუშაობას. გამოწვევების ერთობლივად დაძლევას და ისეთი მომავლის აშენებას, სადაც ჩვენს ხალხებს ექნებათ ძლიერი პერსპექტივები — უსაფრთხოებაში, ეკონომიკაში და შესაბამისად, სოციალურ ცხოვრებაში," — წერს ვოლოდიმირ ზელენსკი X-ზე.

გაერთიანებული სამეფოს პრემიერმინისტრი კირ სტარმერი:

"რუსეთის მხრიდან მოლდოვის დემოკრატიისთვის ძირის გამოთხრის მცდელობის მიუხედავად, მოლდოველმა ხალხმა თავისუფლების გზა აირჩია," — წერს სტარმერი.

საფრანგეთის პრეზიდენტი ემანუელ მაკრონი:

"საფრანგეთი მხარს უჭერს მოლდოვას მის ევროპულ პროექტში და თავისუფლებისა და სუვერენიტეტისკენ სწრაფვაში," — წერს მაკრონი.

პოლონეთის პრემიერმინისტრი დონალდ ტუსკი

"მოლდოვის ხალხისა და პირადად მაია სანდუს მხრიდან ამ არჩევნებში გამარჯვება ნამდვილი სიმამაცე იყო. თქვენ არა მხოლოდ გადაარჩინეთ დემოკრატია და შეინარჩუნეთ ევროპული გზა, არამედ შეაჩერეთ რუსეთის მცდელობა, დაემყარებინა კონტროლი მთელი რეგიონის მიმართ. ეს ყველასთვის კარგი გაკვეთილია," — წერს ტუსკი.

ევროკომისიის პრეზიდენტი ურსულა ფონ დერ ლაიენი

"შენ ნათლად გამოხატე შენი არჩევანი: ევროპა. დემოკრატია. თავისუფლება. ჩვენი კარი ღიაა და ჩვენ შენს გვერდით დავდგებით ყოველ ნაბიჯზე. მომავალი შენია," — წერს ლაიენი.

ევროსაბჭოს პრეზიდენტი ანტონიუ კოშტა

"მოლდოველი ხალხის გზავნილი ხმამაღალი და გასაგებია. რუსეთის მხრიდან ზეწოლისა და ჩარევის მიუხედავად, მათ დემოკრატია და ევროპული მომავალი აირჩიეს. ევროკავშირი მოლდოვის გვერდით დგას ყოველ ნაბიჯზე," — წერს კოშტა.

ევროპარლამენტის პრეზიდენტი რობერტა მეცოლა

"ევროპა მოლდოვაა. მოლდოვა ევროპაა. ამ ისტორიული ნაბიჯით წინ, მოლდოვის ხალხმა აირჩია დემოკრატიის, იმედისა და შესაძლებლობების გზა. მათ აირჩიეს ევროპა," — წერს მეცოლა.

ლატვიის საგარეო საქმეთა მინისტრი ბაიბა ბრაჟე

"ხმების 98%-ის დათვლის შემდეგ, მოლდოვას არჩევანი ნათელია — ევროპულ გზაზე დარჩენა. გილოცავთ!" — წერს ბრაჟე X-ზე.

ამერიკელი სენატორი როჯერ ვიკერი

"მოლდოვის მოსახლეობამ კიდევ ერთხელ მოიგერია კრემლის თავდასხმა მათ საარჩევნო სისტემაზე და აირჩია თავისუფლება. ვულოცავ მაია სანდუს და მის პარტიას, რომლებიც აგრძელებენ ქვეყნის გზას უსაფრთხო მომავლისკენ," — წერს ვიკერი.