საქართველოს სახელმწიფო უსაფრთხოების სამსახურში აცხადებენ, რომ "ჰექსოგენის" საქმეზე დაკავებული ორი პირის შესახებ უკრაინის საელჩოს დაუყოვნებლივ აცნობეს. სუს-მა კომენტარით უკრაინის საელჩოს განცხადებას უპასუხა, სადაც ნათქვამი იყო, რომ დაკავებულ უკრაინელებზე ქართული მხარისგან ოფიციალური ინფორმაცია არ მიუღიათ.

IPN-ის ცნობით, სუს-ში აცხადებენ, რომ გზავნილის მიღება უკრაინის საელჩოს წარმომადგენელმა, ანდრეი ბილიკმა დაადასტურა.

"მიუხედავად იმისა, რომ საქმეში ერთ-ერთი მოწმე პირდაპირ მიუთითებს უკრაინის სპეცსამსახურებზე, როგორც დანაშაულის შემკვეთზე, აღნიშნული ორი პირის დაკავებისთანავე, ჯერ კიდევ იმ ეტაპზე, როცა გამოძიება მხოლოდ ერთი მუხლით იყო დაწყებული, კანონით დადგენილი წესით ეცნობა საგარეო საქმეთა სამინისტროს, რომელმაც ჩვენთვის ცნობილია, რომ ასევე დაუყოვნებლივ აცნობა უკრაინის საელჩოს წარმომადგენელს, კერძოდ, ანდრეი ბილიკს. ამ უკანასკნელს დადასტურებული აქვს შესაბამისი ოფიციალური გზავნილის მიღებაც," — აცხადებენ სუს-ში.

უწყების კომენტარს წინ უძღოდა საელჩოს განცხადება.

"საქართველოში უკრაინის საელჩო ახორციელებს "ქართული სამართალდამცავი ორგანოების მიერ ასაფეთქებელი ნივთიერება ჰექსოგენის უკანონო ტრანსპორტირებაში ეჭვმიტანილი ორი უკრაინის მოქალაქის დაკავების" შესახებ ქართულ მედიაში გავრცელებული ინფორმაციის მუდმივ მონიტორინგს.

ამჟამად, საელჩოს ქართული მხრიდან არ მიუღია ოფიციალური ინფორმაცია მათ წინააღმდეგ ამ ბრალდებებით სისხლის სამართლის საქმის აღძვრის შესახებ.

საელჩოს საკონსულო თანამშრომლები ყოვლისმომცველ ზომებს იღებენ, რათა საქართველოს სამართალდამცავი ორგანოებისგან მიიღონ ნებართვა ზემოაღნიშნულ უკრაინელ მოქალაქეებთან შესახვედრად და მათი დაკავების ყველა გარემოების გასარკვევად," — დაწერა უკრაინის საელჩომ საქართველოში.

შეგახსენებთ, სუს-ის ინფორმაციით, მიმდინარე წლის 10 სექტემბერს სარფის გამშვებ პუნქტში უკრაინის მოქალაქე დააკავეს, რომლებსაც სატვირთო ავტომობილით, "საგულდაგულოდ შენიღბულ სამალავებში მოთავსებული 2.4 კგ ტროტილზე ძლიერი ასაფეთქებელი ნივთიერება ჰექსოგენი შემოჰქონდათ".

უწყების ცნობით, გამოძიებით დგინდება, რომ უკრაინის მოქალაქეს, ავტომანქანის მძღოლს მ.ს.-ს, "უკრაინის ტერიტორიაზე დაუდგენელმა პირმა გადასცა შენიღბულ კასრებში მოთავსებული ასაფეთქებელი ნივთიერება და განუმარტა, რომ საქართველოს საზღვრის გადაკვეთის შემდგომ, მათთან კავშირზე მყოფი სხვა პირი გამოართმევდა აღნიშნულ ნივთიერებას".

გამოძიება სისხლის სამართლის კოდექსის 236-ე მუხლით მიმდინარეობს, რაც ფეთქებადი ნივთიერების მართლსაწინააღმდეგო შეძენას, შენახვას და გადაზიდვას გულისხმობს.