ორი დღით ადრე, სანამ აშშ-ში ულტრამემარჯვენე აქტივისტს, ჩარლი კირკს, იუტის უნივერსიტეტში შეხვედრაზე გასროლით მოკლავდნენ, ვებგამოცემა Jezebel წერდა, რომ Etsy-ზე (ელექტრონული კომერციის პლატფორმა) "კუდიანებს" ფული გადაუხადეს, რათა მათ კირკი "დაეწყევლათ".

"თუკი ცუდი ვარცხნილობის მქონე ულტრამემარჯვენე მიზოგინს დამოუკიდებელი ქალების დემონიზება სურს, Jezebel მოხარული იქნება, ალქაჯად მოევლინოს მას კოშმარებში", — ასეთი შესავალი უძღოდა წინ სტატიას, რომელსაც კირკის მკვლელობის შემდეგ ჯერ რედაქტორის შენიშვნა დაემატა, მერე კი საერთოდ წაიშალა საიტიდან. გამოცემა კირკის მკვლელობას გმობს და აცხადებს, რომ სტატიას მხოლოდ სატირული დანიშნულება ჰქონდა, თუმცა, არ სურთ, ტექსტი ახლა ვინმემ არასწორ კონტექსტში გამოიყენოს.

"ჩვენ პოლიტიკური ძალადობის არცერთ ფორმას მხარს არ ვუჭერთ, არ ვაქეზებთ და არც ვამართლებთ", — ნათქვამია რედაქტორის შენიშვნაში, — "სტატიას მხოლოდ სატირული დატვირთვა ჰქონდა და მასში გარკვევით იყო ნათქვამი, რომ [ავტორი] ფიზიკური ზიანის მიყენებას არ ისურვებდა. ჩვენ ყველა სიტყვაზე პასუხისმგებელი ვართ, მაგრამ მოვლენების ამგვარად განვითარების გამო, ჩვენს იურისტებთან კონსულტაციის საფუძველზე, გადავწყვიტეთ, ტექსტი წაგვეშალა. [...] მოგვიანებით, შეიძლება ის ისევ გამოვაქვეყნოთ, მაგრამ ახლა, გარდაცვლილის ოჯახისადმი თანაგრძნობით, მკაფიოდ ვაცხადებთ, რომ ძალადობის აღკვეთა ჩვენთვის იმაზე მნიშვნელოვანია, ვიდრე რომელიმე მკითხველის სურვილი, კუდიანებზე სტატია წაიკითხოს".

საიტის მფლობელი კომპანიის, Paste Media Group-ის, პრეზიდენტი ჯოშ ჯექსონი კი ამატებს, რომ სტატია "სარკასტულად ეხმაურებოდა Etsy-ზე 'ჯადოების' გაყიდვის პრაქტიკას და სატირული პასუხი იყო ჩარლი კირკის წლების განმავლობაში გამეორებულ რიტორიკაზე".

რაც შეეხება ორიგინალურ ტექსტს, რომელიც საიტიდან უკვე წაიშალა, მასში ავტორი წერდა, როგორ დაუკავშირდა Etsy-ზე თვითგამოცხადებულ "კუდიანებს" და როგორ სთხოვა მათ "ჯადოს" გაკეთება, რათა კირკი "ყველას შეეძულებინა".

"მკაფიოდ განვმარტავ, რომ შავბნელ ძალებს მისთვის ზიანის მიყენებას არ ვთხოვ", — ვკითხულობდით სტატიაში, — "უბრალოდ, მინდა, ყოველ დილას სახეზე მუწუკი ხვდებოდეს, პოდკასტის ყოველი ჩაწერის დაწყებამდე კი მიკროფონი უფუჭდებოდეს".

ავტორის თქმით, ერთ-ერთმა "კუდიანმა" ფოტოც კი გაუგზავნა "ჯადოს" გაკეთების დასტურად — კირკის ცეცხლმოკიდებული სურათი.

"ვითომ, იმუშავებს Etsy-ზე ნაყიდი 'ჯადო'?", — ასე მთავრდებოდა სტატია, — "ამას დრო გვიჩვენებს. ისღა დაგვრჩენია, განგებას დაველოდოთ".