სახალხო დამცველი ლევან იოსელიანი სახელმწიფო უსაფრთხოების სამსახურის ახლადდანიშნულ უფროსს, მამუკა მდინარაძეს შეხვდა. ინფორმაციას სახალხო დამცველის აპარატი ავრცელებს და წერს, რომ იოსელიანმა მდინარაძეს თანამდებობაზე არჩევა მიულოცა.

მათივე ცნობით, შეხვედრაზე სამომავლო გეგმებზე ისაუბრეს.

"10 სექტემბერს სახალხო დამცველი ლევან იოსელიანი სახელმწიფო უსაფრთხოების სამსახურის უფროსს მამუკა მდინარაძეს შეხვდა, ადამიანის უფლებების დაცვის თვალსაზრისით ქვეყანაში არსებული მდგომარეობა განიხილა და სახელმწიფო უსაფრთხოების სამსახურის პრიორიტეტებს გაეცნო.

შეხვედრაზე განსაკუთრებული ყურადღება გაამახვილეს საქართველოს ოკუპირებულ ტერიტორიებსა და საოკუპაციო ხაზის გასწვრივ არსებულ ვითარებაზე.

სახალხო დამცველმა მამუკა მდინარაძეს თანამდებობაზე არჩევა მიულოცა, ურთიერთთანამშრომლობის მნიშვნელობას გაუსვა ხაზი და სამომავლო გეგმებზე ისაუბრა," — წერს სახალხო დამცველი.

ცნობისთვის, მამუკა მდინარაძე სახელმწიფო უსაფრთხოების სამსახურის უფროსის პოსტზე ოცნების პრემიერმინისტრმა, ირაკლი კობაიძემ 23 აგვისტოს წარადგინა. მანამდე სუს-მა გაავრცელა ინფორმაცია, რომ ანრი ოხანაშვილი სუს-ის უფროსის თანამდებობას ტოვებდა და ის ეროვნული უსაფრთხოების საკითხებში ოცნების პრემიერმინისტრის მრჩეველი გახდებოდა. აღნიშნულ პოსტზე მდინარაძის კანდიდატურას ოცნების პარლამენტის 85-მა წევრმა დაუჭირა მხარი.

ასევე იხილეთ: