ევროკომისია საქართველოს მთავრობის მოქმედებებს და მის პასუხს ევროკავშირის მოთხოვნებზე — დაბრუნდეს დემოკრატიულ პრაქტიკებს კვლავ აფასებს და თუ დაადგენს, რომ საქართველო არ ასრულებს რეკომენდაციებს, შესაძლოა უვიზო რეჟიმის შეჩერების მექანიზმი გააქტიურდეს. ამაზე "ევროპეისკაია პრავდასთან" კომისიის წარმომადგენელმა ისაუბრა.

მისი თქმით, ევროკომისია ყურადღებით სწავლობს საქართველოს მთავრობის ნაბიჯებს და საჭიროების შემთხვევაში შეიძლება მიიღოს გადაწყვეტილება სავიზო შეჩერების მექანიზმის ამოქმედებაზე.

"31 აგვისტოს საქართველოს ხელისუფლებამ პასუხი გაუგზავნა ევროკომისიას იმ წერილზე, რომელიც 14 ივლისს ბრიუსელში საქართველოს ელჩს გადაეცა. კომისია ახლა სწავლობს ამ პასუხს...კომისია შეაფასებს მიღებულ ზომებს და მათ შესაბამისობას რეკომენდაციებთან, უვიზო რეჟიმის შეჩერების მექანიზმთან დაკავშირებული შემდეგი ანგარიშის კონტექსტში," — აღნიშნა წარმომადგენელმა.

ბრიუსელში ასევე ელიან, რომ საქართველოს ხელისუფლება "მიღებულ რეკომენდაციებთან დაკავშირებით კონკრეტულ ნაბიჯებს გადადგამს".

"ხანგრძლივი შეუსრულებლობის შემთხვევაში და შეფასების შემდეგ, კომისიამ შესაძლოა მიიღოს გადაწყვეტილება უვიზო რეჟიმის შეჩერების მექანიზმის ამოქმედებაზე," — თქვა ევროკომისიის წარმომადგენელმა.

მან აღნიშნა, რომ გასულ კვირას საქართველოს ხელისუფლებამ კიდევ ერთი ნაბიჯი გადადგა დემოკრატიის წინააღმდეგ და დამოუკიდებელი სამოქალაქო ორგანიზაციების საბანკო ანგარიშები გაუყინა.

"ეს არის კიდევ ერთი შეტევა ფუნდამენტურ უფლებებზე და მართლმსაჯულების გამოყენება რეპრესიების იარაღად. ევროკავშირი მოუწოდებს საქართველოს ხელისუფლებას, დაუყოვნებლივ გააუქმოს ეს გადაწყვეტილება" — დასძინა მან.

ცნობისთვის, 14 ივლისს ევროკავშირმა საქართველოს წერილი გამოუგზავნა, რომელშიც მოითხოვა კანონის უზენაესობის აღდგენა და ოპოზიციის წევრებზე დაკისრებული მკაცრი სასჯელების გადახედვა 2025 წლის 31 აგვისტომდე, წინააღმდეგ შემთხვევაში საქართველოს მოქალაქეებისთვის ვიზალიბერალიზაციის რეჟიმი შეჩერდება.

ევროკავშირის უმაღლესმა დიპლომატმა კაია კალასმა დაადასტურა, რომ ევროკავშირი განიხილავს ვიზალიბერალიზაციის შეჩერებას საქართველოს ხელისუფლებაზე ზეწოლის მიზნით.