კატალონიის ლიდერები აცხადებენ, რომ მადრიდის ნების საწინააღმდეგოდ რეფერენდუმი მაინც ჩატარდება. დილიდანვე საარჩევნო უბნებთან კატალონიის მცხოვრებლებმა რიგი დაიკავეს. ზოგიერთი უბნის შესასვლელთან პოლიციისგან თავდასაცავად ტრაქტორებიც დგას.

ფოტო: AFP

კატალონიის ხელისფულება აცხადებს, რომ რეფერენდუმისთვის ყველაფერი მზადაა და კატალონიელების მაღალ აქტივობას ელოდებიან. საარჩევნო უბნები ადგილობრივი დროით დილის ცხრა საათზე გაიხსნება და საღამოს რვა საათზე ხმის მიცემა დასრულდება.

ორგანიზატორებმა მოქალაქეებს საარჩევნო უბნებზე ადრე მისვლისკენ მოუწოდეს, რათა მათ რიგი "დაიცვან".

რეფერენდუმამდე ბარსელონაში ხმის მიცემის წინააღმდეგ საპროტესტო აქცია გაიმართა. ერთ-ერთმა დემონსტრანტმა ბარსელონის ცენტრში, სადაც რეგიონული ხელისუფლებისა და ქალაქის მერიის შენობებია განთავსებული, კატალონიის დროშა დაწვა. ზოგიერთმა მერიის შენობაზე დაკიდებული ტრანსპარანტის "მეტი დემოკრატიის" ჩამოხსნა სცადა.

შაბათს ესპანეთის პოლიციამ კატალონიაში 2315 სკოლიდან, სადაც საარჩევნო უბნები უნდა გახსნილიყო, 1300 დალუქა. მანამდე კი კატალონიის ტელეკომუნიკაციის შენობა დაიკავა. სკოლის შენობებში ზოგიერთმა ამომრჩეველმა კარავიც კი გაშალა. მათ, რომელთა უმეტესობა მოსწავლეები და მშობლები არიან, პარასკევს შენობის დატოვებაზე უარი თქვეს.

ფოტო: Reuters

კატალონია ესპანეთის ავტონომიური გაერთიანებაა, რომლის მოსახლეობა 7,5 მილიონია. მას აქვს საკუთარი ენა და დროშა. ესპანეთისგან გამოყოფის იდეა ბოლო ხუთი წლის განმავლობაში საკმაოდ პოპულარული გახდა.

2014 წელს ესპანეთის ხელისუფლება კატალონიაში რეფერენდუმის ჩატარება დაბლოკა. ერთი წლის შემდეგ, წელს კატალონიის ხელისუფლებაში დამოუკიდებლობის მომხრე პარტია მოვიდა. 2017 წლის ივნისში ცნობილი გახდა, რომ პირველ ოქტომბერს კატალონიის ესპანეთიდან გამოყოფისა და მისი რესპუბლიკად ჩამოყალიბების რეფერენდუმი ჩატარდებოდა.