საზოგადოებრივი მაუწყებლის აჭარის ტელევიზიისა და რადიოს დირექტორი, ვლადიმერ ტატიშვილი თანამდებობიდან გადადგა. ამის შესახებ საზმაუს სამეურვეო საბჭოს სხდომაზე გახდა ცნობილი.

ტატიშვილს უფლებამოსილების ვადა მიმდინარე წლის ნოემბერში ეწურებოდა. მის მოვალეობას პირველი მოადგილე, ეკატერინე შაინიძე შეასრულებს.

"როცა დღის წესრიგი შემდგარი იყო, შემდეგ შემოიტანა აჭარის ტელევიზიის დირექტორმა განცხადება გადადგომის შესახებ. ეს ცნობად უნდა მივიღოთ და დავაკმაყოფილოთ. მის ნაცვლად მოვალეობას შეასრულებს პირველი მოადგილე, ეკატერინე შაინიძე," — აცნობა საბჭოს თავმჯდომარემ, ვასილ მაღლაფერიძემ წევრებს.

ტატიშვილის გადადგომას სოციალურ ქსელში "ბათუმელების" ჟურნალისტი მანანა ქველიაშვილი გამოეხმაურა და დაწერა, რომ სწორედ ვლადიმერ ტატიაშვილია ის, ვინც "12 იანვრის მზია ამაღლობელის კადრები დამალა".

"ამ კაცმა დამალა 12 იანვრის კადრები. 44 წამი მისცეს მხოლოდ პროკურატურას. წერილით რომ მოვითხოვეთ, მოგვწერა "თქვენ მიერ მოთხოვნილი კადრები არ წარმოადგენს საჯარო ინფორმაციას, რადგან შეიცავს პერსონალურ მონაცემებსო“. საპროტესტო აქციის კადრებზეა საუბარი, რაიმე კონფიდენციალური ინფორმაცია არ გეგონოთ.

ოღონდ ამ ოპერაციაში მარტო ეს არ მონაწილეობდა, ბევრი თანამშრომელი გარია. ამიტომ ისევ და ისევ, ყველას, ვისი წვლილიც არის ამ ამბავში, გისურვებთ ისეთ სამართალს, როგორი სამართალიც თქვენი ხელშეწყობით მზია ამაღლობელისათვის დადგა!", — დაწერა ქველიაშვილმა.