ფინანსთა სამინისტროს შემოსავლების სამსახური მზადყოფნას გამოთქვამს, რომ საგადასახადო შეთანხმების შემთხვევაში, "ბათუმელები/ნეტგაზეთის" ანგარიშებს ყადაღა მოუხსნას და შესაბამისი გრაფიკის მიხედვით, დავალიანების დაფარვის საშუალება მისცეს. ამის შესახებ შემოსავლების სამსახურის განცხადებაშია აღნიშნული.

მედია ორგანიზაცია "ბათუმელები" წერს, რომ შემოსავლების სამსახურთან კომუნიკაცია მანამდე ჰქონდათ, ვიდრე უწყება ამ განცხადებას გაავრცელებდა. გამოცემა წერს, რომ "როგორც ინკასოს დადებამდე, ისე მის შემდეგ, სამსახურმა ვალის გრაფიკის გაწერაზე უარი თქვა".

შემოსავლების სამსახურის ცნობით, 2025 წლის 21 ივლისის მდგომარეობით, შპს "ბათუმელებს" აღიარებული საგადასახადო დავალიანება 282,191.97 ლარის ოდენობით უფიქსირდება.

"საზოგადოებრივი ინტერესის გათვალისწინებით, ფინანსთა სამინისტროს შემოსავლების სამსახური განმარტავს, რომ 2025 წლის 21 ივლისის მდგომარეობით მედიაპლატფორმა — "ბათუმელებს" უფიქსირდება აღიარებული საგადასახადო დავალიანება 282,191.97 ლარის ოდენობით.

ასევე განვმარტავთ, რომ საგადასახადო დავალიანების ანაზღაურების უზრუნველყოფის ღონისძიება (ანგარიშებზე ყადაღის დადება) ხდება ავტომატურ რეჟიმში, ელექტრონულ სისტემაში ინტეგრირებული რისკების შეფასების ინდიკატორებზე დაყრდნობით.

შემოსავლების სამსახური გამოთქვამს მზადყოფნას, რომ საგადასახადო შეთანხმების შემთხვევაში, მოუხსნას ყადაღა "ბათუმელების" ანგარიშებს და შესაბამისი გრაფიკის მიხედვით, მისცეს საშუალება რომ დაფაროს სახელმწიფო ბიუჯეტის წინაშე არსებული დავალიანება," — ნათქვამია შემოსავლების სამსახურის განცხადებაში.

შეგახსენებთ, 21 ივლისს გამოცემა "ბათუმელებმა" გაავრცელა ინფორმაცია, რომ შემოსავლების სამსახურმა მედიაპლატფორმის ანგარიშებს ინკასო დაადო. გამოცემამ დაწერა, რომ ოფიციალური მიზეზი დავალიანებაა, რეალური მიზეზი კი სურვილი, რომ მედია ორგანიზაციამ საქმიანობა შეწყვიტოს.

"ეს არის ზეწოლა მზია ამაღლობელზე, რომ ის დანებდეს. რამდენიმე დღეში მოსამართლე ნინო სახელაშვილი შპს "გაზეთ ბათუმელების" დამფუძნებელს, მზია ამაღლობელს განაჩენს გამოუტანს", — აღნიშნულია "ბათუმელების" მიერ 21 ივლისს გავრცელებულ განცხადებაში.

გამოცემის განცხადებით, "ბათუმელებს" სახელმწიფოს წინაშე არსებული დავალიანება აღიარებული ჰქონდა და ყოველთვიურად იხდიდა შესაბამის თანხებს მის დასაფარად. "ბათუმელების" ანგარიშებს ინკასო 17 ივლისს დაადეს.

"მათ მიერ გავრცელებულ განცხადებაში ნათქვამია, რომ "პირველ ივლისს "ბათუმელებს" შემოსავლების სამსახურიდან დაუკავშირდნენ და აცნობეს, რომ ვალი გვაქვს, რომელიც 5 დღეში უნდა გადავიხადოთ. წინააღმდეგ შემთხვევაში ანგარიშებს ინკასოს დაადებენ, შემდეგ კი ქონებას დააყადაღებენ და დაიწყება აღსრულება. ანუ აღსრულების ეროვნული ბიურო "ბათუმელების" ქონებას გაყიდის. საუბარია რედაქციის ტექნიკურ აღჭურვილობასა და ოფისზე.

ამ ეტაპზე "ბათუმელების" დავალიანება ბიუჯეტის წინაშე — ძირი თანხა არის 47 ათასი ლარი [თვის დასაწყისში იყო 136 ათასი ლარი და გადავიხადეთ]. ასევე გვერიცხება სხვა თანხაც — საურავი 126 ათასი ლარი და ჯარიმა — 109 ათასი ლარი.

"ბათუმელებს" სახელმწიფოს წინაშე არსებული დავალიანება აღიარებული ჰქონდა და ყოველთვიურად იხდიდა შესაბამის თანხებს მის დასაფარად.

ინკასოს მუქარის შემდეგ, "ბათუმელებმა" შემოსავლების სამსახურს ოფიციალურად მიმართა და ითხოვა ვალის გადასახდელად ჩვენთვის შემოეთავაზებინათ გრაფიკი. ამას საგადასახადო კოდექსი ითვალისწინებს. უარი გვითხრეს. 17 ივლისს კი, "ბათუმელების" ანგარიშებს დაადეს ინკასო," — აღნიშნულია განცხადებაში, რომელიც "ბათუმელებმა" 21 ივლისს გაავრცელა.

ამასთან, დღეს ცნობილი გახდა, რომ მკითხველებმა მედიაორგანიზაცია "ბათუმელები/ნეტგაზეთს" დავალიანების ძირი თანხა შეუგროვეს.

"დღეს, 22 ივლისს, "ბათუმელებმა" გადაიხადა 47 ათასი ლარი. სწორედ ამ ოდენობის დავალიანება — ძირი თანხა — ჰქონდა ორგანიზაციას ბიუჯეტის წინაშე. "ბათუმელებმა" ამ დავალიანების დაფარვა მოახერხა მკითხველის მხარდაჭერით. დიდი მადლობა მხარდაჭერისთვის", — წერს მედიაორგანიზაცია.

ამ ეტაპზე "ბათუმელებს" გადასახდელი დარჩა ძირ თანხაზე დარიცხული საურავი და ჯარიმა: საურავი 126 ათასი ლარი და ჯარიმა – 109 ათასი ლარი.

ასევე იხილეთ: