ხუთშაბათს, ფელიქს ბაუმგარტნერი, პარაშუტისტი, რომელიც ქართველმა საზოგადოებამ 2012 წელს კოსმოსიდან ისტორიული გადმოხტომის ილეთით გაიცნო, იტალიაში, პარაგლაიდინგის დროს გარდაიცვალა.

ავსტრიელი ექსტრემალური სპორტის პიონერმა ათ წელზე მეტი ხნის წინ მსოფლიო გააოცა, როდესაც გახდა პირველი ადამიანი, რომელმაც ზებგერითი ბარიერი გადალახა და კოსმოსის ზღვრიდან თავისუფალი ვარდნა განახორციელა. უშიშარი ავსტრიელი 39 კილომეტრის სიმაღლიდან გადმოხტა და ამ სარისკო ნახტომით თავისი სახელი რეკორდების წიგნში ჩაწერა.

ფელიქს ბაუმგარტნერი 17 ივლისს გარდაიცვალა იტალიაში, მას შემდეგ რაც მისი პარაგლაიდერი ავარიაში მოჰყვა სანაპირო ქალაქ პორტო სანტ’ელპიდიოში, — ინფორმაცია ქალაქის მერმა, მასიმილიანო ჩიარპელამ დაადასტურა. ბაუმგარტნერი 56 წლის იყო.

"ჩვენი საზოგადოება ღრმად შეძრულია ფელიქს ბაუმგარტნერის ტრაგიკული გარდაცვალებით — ადამიანი, რომელიც მსოფლიო მასშტაბით სიმამაცისა და ექსტრემალური ფრენისადმი ვნების სიმბოლო იყო," — დაწერა მერმა იტალიურ ენაზე Facebook-ზე. "პორტო სანტ’ელპიდიო ამ მწუხარების წუთებში მის ოჯახსა და ახლობლებს გვერდით უდგას."

ფოტო: Manfred Schmid/Getty Images

NBC News-ის ცნობით, შემთხვევის ადგილზე ჩასული მაშველების განცხადებით, ბაუმგარტნერი ცენტრალურ იტალიაში, საცურაო აუზის კედელს შეეჯახა.

56 წლის სპორტსმენმა კონტროლი დაკარგა მოტორიზებულ პარაგლაიდერზე, როცა მარშეს რეგიონში, პორტო სანტ’ელპიდიოს თავზე მიფრინავდა. ის ჰაერიდან ვარდნის შემდეგ სასტუმროს საცურაო აუზში ჩავარდა.