საქართველოს საგარეო საქმეთა მინისტრი, მიხეილ ჯანელიძე ამბობს, რომ საზღვარგარეთ საკვირაო სკოლები და ქართული ხელოვნების ანსამბლები ქართული კულტურის პოპულარიზაციისთვის საჭირო ინვენტარით აღიჭურვება. მინისტრის თქმით, ამჟამად საჭიროებების ეტაპობრივ დამუშავებაზე მუშაობენ. ამის შესახებ ჯანელიძემ დიასპორის და კავკასიის საკითხთა საპარლამენტო კომიტეტის სხდომაზე ისაუბრა.

როგორც საგარეო საქმეთა სამინისტროში აღნიშნავენ, მიხეილ ჯანელიძემ ისაუბრა ახალ ინიციატივაზეც ინოვაციური ვებ-პორტალის შექმნაზე, რომლის მიზანიც უცხოეთში მცხოვრები ქურთული დიასპორის წარმომადგენლების ერთმანეთთან კავშირია.

საზღვარგარეთ 272 ქართული დიასპორული გაერთიანება მოქმედებს, მათ შორისაა საკვირაო სკოლები, ქართული ცეკვისა და სიმღერის ანსამბლები, სტუდენტური ორგანიზაციები, სპორტული გუნდები.