სტრასბურგში, ევროპარლამენტში, პლენარულ სხდომაზე საქართველოზე ანგარიშთან დაკავშირებით დებატები დღეს, 8 ივლისს გაიმართება. ამის შესახებ ინფორმაცია ევროპარლამენტის ოფიციალურ ვებგვერდზეა განთავსებული.

კენჭისყრა 9 ივლისსა დაგეგმილი. 32-პუნქტიანი ანგარიში საქართველოს 2023-2024 წლების ვითარებას შეეხება და მოუწოდებს ევროკომისიას, გადახედოს ევროკავშირსა და საქართველოს ასოცირების შეთანხმების შესრულებას, იმის ფონზე, რომ საქართველო უხეშად არღვევს შეთანხმების მე-2 მუხლით განსაზღვრულ ზოგად პრინციპებს.

ამას გარდა, ანგარიში ითხოვს, რომ დაუყოვნებლად დაწესდეს მიზანმიმართული პერსონალური სანქციები ბიძინა ივანიშვილზე, მის ოჯახის წევრებსა და მის კომპანიებზე; ასევე მოუწოდებს ევროკავშირს, ითანამშრომლოს სხვა იურისდიქციებთან — განსაკუთრებით გაერთიანებულ სამეფოსთან — ივანიშვილის ფინანსური აქტივების გაყინვის მიზნით.

ანგარიშში ევროკომისია "ღრმა სინანულს გამოთქვამს იმ ფაქტზე, რომ მმართველმა პარტიამ ქართული ოცნება ვერ გამოიყენა საქართველოსთვის, როგორც კანდიდატი ქვეყნისთვის, მინიჭებული ისტორიული შანსი ქვეყნის ევროპული ინტეგრაციის გზაზე პროგრესის მისაღწევად.

ანგარიშში ევროპარლამენტი ქართულ ოცნებას მოუწოდებს, თავი შეიკავოს ძალადობრივი ხერხებით პროტესტის ჩახშობისგან და გააუქმოს ის რეპრესიული კანონები, რაც შეკრებისა და გამოხატვის თავისუფლებას ზღუდავს.

ანგარიშში ასევე აღნიშნულია, რომ 2024 წლის ოქტომბრის საპარლამენტო არჩევნების შემდეგ, ევროკავშირის კანდიდატმა ქვეყანამ აშკარად "ავტორიტარული მმართველობისკენ გადაუხვია". მათი თქმით, ამ არადემოკრატიულმა არჩევნებმა ქართული ოცნებას საშუალება მისცა, "უკანონოდ დაჰპატრონებოდა სახელმწიფო ინსტიტუტებს, რეპრესიული კანონმდებლობა გაეტარებინა და პოლიტიკურ ოპონენტებს, ჟურნალისტებს და მშვიდობიან დემონსტრანტებს თავს დასხმოდა.

რასა იუკნევიჩიენეს მომზადებულ ანგარიშში ევროპარლამენტი მოუწოდებს ევროკავშირის წევრ ქვეყნებს, თავი შეიკავონ ქართული ოცნების წარმომადგენლებთან შეხვედრისგან. ანგარიშში ასევე ნახსენებია "დე ფაქტო პრეზიდენტი" და სალომე ზურაბიშვილს ლეგიტიმურ პრეზიდენტად მოიხსენიებენ.

დოკუმენტის მიხედვით, ქართული ოცნების მმართველობის პირობებში საქართველომ ვერ მოახერხა წინსვლა — და პირიქით, უკუსვლა განიცადა — ევროკომისიის მიერ მითითებული ცხრა ნაბიჯის ძირითადი მიმართულებებით, მიუხედავად ხელისუფლებისგან ამის საწინააღმდეგო განცხადებებისა.

ანგარიშის მიხედვით:

"საქართველოს ევროინტეგრაციის პროცესი ფაქტობრივად შეჩერებულია ქვეყანაში დემოკრატიის უკუსვლის გაგრძელების შედეგად, ასევე 2024 წლის ოქტომბრის გაყალბებული საპარლამენტო არჩევნების ფონზე, რაც მკაფიო გარდამტეხ წერტილად იქცა ავტორიტარული რეჟიმისაკენ მიმართული კურსის დასასმელად; ამას დაემატა სახელმწიფო ინსტიტუტებისა და დემოკრატიული უსაფრთხოების მექანიზმების არაკანონიერი ხელში ჩაგდება, და ანტიდემოკრატიული ხასიათის მქონე კანონმდებლობის მიღება, რაც ეწინააღმდეგება იმ ღირებულებებსა და პრინციპებს, რომელზეც ევროკავშირია დაფუძნებული; სრულად იზიარებს ევროპული საბჭოს 2024 წლის 27 ივნისის დასკვნებს, რომ არსებული კურსის გაუქმების გარეშე საქართველოს ევროკავშირში გაწევრიანების პერსპექტივა სერიოზულად რისკის ქვეშ დგება, და მოუწოდებს ქართულ ოცნებას დაუბრუნდეს დემოკრატიული რეფორმებისა და ევროატლანტიკური ინტეგრაციის გზას".

ანგარიში "გმობს დაახლოებით 700 საჯარო მოხელის სამსახურიდან დათხოვნას 2024 წლის დეკემბრის შემდეგ, რაც უკავშირდება მათ მონაწილეობას ან მხარდაჭერას პროევროპულ საპროტესტო აქციებში; ხაზს უსვამს, რომ მსგავსი სახის რეპრესიები აქვეითებს საზოგადოების ნდობას დემოკრატიული ინსტიტუტების მიმართ, არღვევს გამოხატვისა და გაერთიანების თავისუფლებას და ამყარებს მმართველი რეჟიმის ავტორიტარულ ტენდენციებს; მოუწოდებს საქართველოს ხელისუფლებას, დაიცვას შრომის კანონმდებლობის სტანდარტები და საჯარო მოხელეებს მისცეს უფლება, დაარეგისტრირონ პროფესიული კავშირი, რათა დაიცვან საკუთარი შრომითი უფლებები უსამართლო შეზღუდვებისგან; გამოხატავს შეშფოთებას საჯარო სამსახურში დანიშვნების მზარდი პოლიტიზაციის გამო და მოუწოდებს, გაუქმდეს 2024 წლის დეკემბერში მიღებული ცვლილებები საჯარო სამსახურის შესახებ კანონში, რომელიც აუქმებს კონკურსის წესს საჯარო მოხელეთა დანიშვნისთვის და პირდაპირი დანიშვნის უფლებას ანიჭებს საჯარო უწყებების ხელმძღვანელებს; კვლავ აღნიშნავს, რომ ეს ცვლილებები წარმოადგენს უკან გადადგმულ ნაბიჯს საჯარო სამსახურის იმ წარმატებული რეფორმიდან, რომელიც განხორციელდა საქართველოს მიერ ევროკავშირსა და საქართველოს ასოცირების შეთანხმების ფარგლებში, და მოუწოდებს მათ გაუქმებას.

ხაზგასმით აღნიშნავს ევროკავშირის პოლიტიკის დაუყოვნებელი და ყოვლისმომცველი გადახედვის აუცილებლობას საქართველოს მიმართ, მიმდინარე დემოკრატიული უკუსვლისა და სულ უფრო რეპრესიული პოლიტიკური და საკანონმდებლო გარემოს გათვალისწინებით, რაც მნიშვნელოვან უკან გადდაგმულ ნაბიჯს წარმოადგენს საქართველოს დემოკრატიული მიღწევებისა და წარმატებული ევროინტეგრაციის რეფორმებისთვის, არღვევს დემოკრატიული ინსტიტუტების საფუძველს და კიდევ უფრო აძლიერებს მმართველი პარტიის ძალაუფლებას;

ამასთან დაკავშირებით, მოუწოდებს ევროკომისიას, გადახედოს ევროკავშირსა და საქართველოს ასოცირების შეთანხმების შესრულებას, იმის ფონზე, რომ საქართველო უხეშად არღვევს შეთანხმების მე-2 მუხლით განსაზღვრულ ზოგად პრინციპებს, რაც მოიცავს დემოკრატიული პრინციპების, ადამიანის უფლებებისა და ფუნდამენტური თავისუფლებების პატივისცემას; კიდევ ერთხელ მიუთითებს, რომ ამ ვალდებულებების შეუსრულებლობა შესაძლოა გამოიწვიოს ეკონომიკური თანამშრომლობისა და შეთანხმებით მინიჭებული პრივილეგიების პირობით შეწყვეტას;

გმობს იმ ფაქტს, რომ მმართველი პარტიის მაღალი თანამდებობის პირები, პარლამენტის წევრები და ხელისუფლებასთან დაკავშირებული მედიასაშუალებები რეგულარულად ავრცელებენ მანიპულაციურ ნარატივებს, დეზინფორმაციასა და შეთქმულების თეორიებს ევროკავშირის, მისი წევრი ქვეყნების, ლიდერებისა და პოლიტიკოსების, ასევე ევროპული ინტეგრაციის წინააღმდეგ; ხაზს უსვამს, რომ მმართველი პარტიის რეჟიმი განაგრძობს მიზანმიმართულად ცრუ და ორაზროვან რიტორიკას, რაც ხელს უწყობს საზოგადოების ნაწილისთვის მცდარი წარმოდგენის ჩამოყალიბებას, თითქოს პარტია კვლავ უჭერს მხარს ევროპულ ინტეგრაციას; გულწრფელად წუხს იმის გამო, რომ მედია და საინფორმაციო გარემო იდევნება და ფაქტობრივად დომინირებულია ქართული ოცნების მხარდამჭერი ტელევიზიებისა და მედიასაშუალებების მიერ, რომლებიც ავრცელებენ ევროკავშირში ინტეგრაციის წინააღმდეგ მიმართულ ცრუ ნარატივებს, რითაც ემსგავსებიან და ხელს უწყობენ რუსეთისგან შთაგონებული პროპაგანდის გავრცელებას და საზოგადოებაში პოლარიზაციის გაღრმავებას;

ხაზს უსვამს ბიძინა ივანიშვილის, ასევე სხვა ოფიციალური პირებისა და პოლიტიკური ლიდერების — ირაკლი კობახიძის, შალვა პაპუაშვილის, ვახტანგ გომელაურის, თბილისის მერისა და ქართული ოცნების გენერალური მდივნის კახა კალაძის, და პარტიის ყოფილი თავმჯდომარის ირაკლი ღარიბაშვილის — პასუხისმგებლობას ქვეყანაში პოლიტიკური პროცესის დეგრადაციაზე, მათ მიერ დემოკრატიული უკუსვლის ხელშეწყობითა და ავტოკრატიული ძალაუფლების კონსოლიდაციის გზით, რაც ეწინააღმდეგება საქართველოს კონსტიტუციურ მიზანს ევროატლანტიკური ინტეგრაციისკენ; შესაბამისად, მოუწოდებს დაუყოვნებლად დაწესდეს მიზანმიმართული პერსონალური სანქციები ბიძინა ივანიშვილზე, მის ოჯახის წევრებსა და მის კომპანიებზე; ასევე მოუწოდებს ევროკავშირს, ითანამშრომლოს სხვა იურისდიქციებთან — განსაკუთრებით გაერთიანებულ სამეფოსთან — ივანიშვილის ფინანსური აქტივების გაყინვის მიზნით; გმობს უნგრეთისა და სლოვაკეთის მთავრობების მიერ საბჭოს გადაწყვეტილებების დაბლოკვას, რომელიც მიზნად ისახავს სანქციების დაწესებას საქართველოს დემოკრატიული უკუსვლისთვის პასუხისმგებელ პირებზე; გმობს უნგრეთის მთავრობის ერთპიროვნულ ქმედებებს ქართული ოცნების ლეგიტიმაციის ხელშესაწყობად, — ვკითხულობთ დოკუმენტში.

ანგარიში საქართველოზე მომხსენებელმა რასა იუკნევიჩიენემ მოამზადა და ანგარიშის საფუძველზე შემუშავებულ რეზოლუციას საგარეო კომიტეტში კენჭი უკვე უყარეს.

მიმდინარე წლის 4 ივლისს, ევროპარლამენტის საგარეო ურთიერთობების კომიტეტმა საქართველოს შესახებ ანგარიშის პროექტი დაამტკიცა. მას 55 ევროპარლამენტარმა დაუჭირა მხარი, 14-მა მის წინააღმდეგ მისცა ხმა, ხოლო 4-მა — თავი შეიკავა. ანგარიში ევროპარლამენტარმა რასა იუკნევჩიენემ მოამზადა.