არასამთავრობო ორგანიზაცია საერთაშორისო გამჭვირვალობა - საქართველომ ზოგიერთი პოლიტიკური ლიდერის მიერ პარლამენტარების შეუთავსებელ საქმიანობაზე გამოქვეყნებული ანგარიშის შესახებ გაკეთებულ შეფასებებს არასწორი და არაკორექტული უწოდა.

ორგანიზაციის თქმით, ისინი საქართველოს პარლამენტის წევრთა შეუთავსებელ საქმიანობასა და არადეკლარირებულ ქონებაზე პერიოდულად აქვეყნებენ ანგარიშებს, რომლებსაც, ზოგჯერ, პარლამენტთან თანამშრომლობით აცნობდნენ დეპუტატებს:

"შედეგად საქართველოს პარლამენტის წევრები ასწორებდნენ დეკლარაციებში არსებულ უზუსტობებს, რაც წარმოადგენს კიდეც მსგავსი ანგარიშების მომზადების მიზანს."

საერთაშორისო გამჭვირვალობის განცხადებით, წარმოდგენილი ანგარიში ეყრდნობა საჯარო ინფორმაციას, რომელიც ნებისმიერი დაინტერესებული პირისთვისაა ხელმისაწვდომი და პარლამენტის თავმჯდომარის "მწვავე შეფასებების" მიუხედავად, ანგარიშში არც ერთი ფაქტობრივი შეცდომა არ დასახელებულა:

"საპროცედურო საკითხთა და წესების კომიტეტის თავმჯდომარემ აღიარა, რომ იგი ინფორმირებული იყო იმის თაობაზე, რომ პარლამენტის წევრები დირექტორებად ფიქსირდებიან კომპანიებში, რაც მისი თქმით, "რა თქმა უნდა, არის დარღვევა" და მუდმივად აფრთხილებს კოლეგებს, რათა გამოასწორონ მსგავსი უზუსტობები."

ორგანიზაციის თქმით, ზოგიერთმა დეპუტატმა არ უარყო კომპანიების არსებობა, თუმცა მიუთითეს, რომ ამჟამად სამეწარმეო საქმიანობას არ ახორციელებენ:

"კანონმდებლობის თანახმად, სამეწარმეო სუბიექტი არსებობას მხოლოდ რეგისტრაცის გაუქმების შემდეგ წყვეტს. ყველა კომპანია, რომელიც ნახსენებია კვლევაში, იძებნება საჯარო რეესტრის ბაზაში "აქტიურის" სტატუსით."

საერთაშორისო გამჭვირვალობა - საქართველოს განმარტებით, ანგარიშის გამოქვეყნებას პარლამენტის ორი წევრის მხრიდან უკვე მოყვა "სათანადო რეაგირება":

"კერძოდ, ქართული ოცნების დეპუტატმა დავით ჭიჭინაძემ და მამუკა ჩიქოვანმა “ევროპული საქართველოდან” მიმართეს საჯარო რეესტრის ეროვნულ სააგენტოს დირექტორის უფლებამოსილების შეწყვეტის შესახებ."

19 სექტემბერს არასამთავრობო ორგანიზაცია საერთაშორისო გამჭირვალობა საქართველომ გამოაქვეყნა კვლევა, რომლის მიხედვითაც პარლამენტის ცხრა დეპუტატს პარლამენტის წევრის სტატუსთან შეუთავსებელი საქმიანობა აქვს, 16-ს კი - არადეკლარირებული ბიზნეს აქტივები.