ქართული სერიალების მოყვარულებს ამ ზაფხულს საინტერესო სიახლე ელოდებათ — კავეა პლუსზე სულ მალე ახალი რომანტიკული კომედიის პრემიერა შედგება. ვინ იცის მერი — ასე ჰქვია სერიალს, რომელშიც ვარსკვლავურ სამსახიობო შემადგენლობას ვიხილავთ.

სერიალის მთავარი გმირი 34 წლის მერია, რომელიც თავის საუკეთესო მეგობართან, მისგან რადიკალურად განსხვავებულ ლიზასთან ერთად ცხოვრობს. მერი კინოხელოვნების ლექტორია და სცენარის დაწერა აქვს ჩაფიქრებული, პირად ცხოვრებაში კი ტოქსიკური ურთიერთობასთან გამკლავება უწევს. "სანამ ოცდაათის გახდები, ვინმემ ინსტრუქცია რომ მოგაწოდოს და გითხრას, წინ რა გელოდება, ცუდი არ იქნება", — ამბობს პერსონაჟი სერიალის ტრეილერში, რომელიც ცოტა ხნის წინ გავრცელდა.

ვინ იცის მერის რეჟისორი ჩცდ-ისა და ხელოვნური სუნთქვის შემქმნელი გიორგი ლიფონავაა, რომელიც, ამავდროულად, თავადაც მონაწილეობს სერიალში. მეტიც, აქ საინტერესო "ქროსოვერია" — ლიფონავა ექიმ ილია ვეკუას როლში გვევლინება, რომელიც ხელოვნური სუნთქვის მესამე სეზონში გავიცანით.

სერიალში მთავარ როლებს კი ნატალია ჯუღელი, თინა დალაქიშვილი, გივიკო ბარათაშვილი და პაატა ინაური ასრულებენ. ტრეილერში ასევე ვხედავთ გიორგი ბახუტაშვილს და მომღერალ გიორგი თორაძეს.

ვინ იცის მერის პრემიერა კავეა პლუსზე 10 ივლისს შედგება. მაყურებელი ახალ სერიებს ხუთშაბათობით იხილავს.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…