ევროკავშირმა უნდა განაახლოს და გააძლიეროს დიპლომატიური ზეწოლა იმ ქვეყნებზე, რომლებიც კვლავ ინარჩუნებენ მჭიდრო კავშირებს რუსეთთან, "რათა გაზარდონ ზეწოლა კრემლზე, დათანხმდეს 30-დღიან უპირობო ცეცხლის შეწყვეტას უკრაინაში", – ნათქვამია ევროკავშირის 15 წევრი სახელმწიფოს ერთობლივ განცხადებაში, რომელიც ევროკავშირის უმაღლეს წარმომადგენელს, კაია კალასს გადაეგზავნა.

წევრი ქვეყნების ერთობლივი განცხადების შესახებ ინფორმაციას Euronews ავრცელებს.

მათი ცნობით, წერილი გამოქვეყნდა მას შემდეგ, რაც გასულ კვირას კიევისა და მოსკოვის წარმომადგენლებს შორის პირისპირ, დაბალი დონის მოლაპარაკებებმა ვერ მიაღწია პროგრესს ცეცხლის შეწყვეტის თაობაზე.

ბრიუსელი უკვე დაემუქრა მოსკოვს სანქციების ახალი სერიით იმ შემთხვევაში, თუ რუსეთი უარს იტყვის ზავზე.

"ბევრი ქვეყანა ინარჩუნებს მჭიდრო კავშირებს მოსკოვთან, რაც შეიძლება და უნდა გამოყენებული იყოს რუსეთზე დიპლომატიური ზეწოლის გასაძლიერებლად. ეს კომუნიკაცია ორივე მიმართულებით უნდა წარიმართოს", — წერია 15 წევრი სახელმწიფო წერილში..