კვიპროსმა ინვესტიციების სანაცვლოდ გაცემული მოქალაქეობით, ბოლო ოთხი წლის განმავლობაში, 4 მილიარდი ევრო გამოიმუშავა. ინფორმაციას ამის შესახებ ბრიტანული The Guardian ავრცელებს.

კვიპროსის ხელისუფლება გასცემს ქვეყნის მოქალაქეობას ინვესტორებზე, რომლებიც თანხას ქვეყნის უძრავი ქონების სეგმენტში, ან სახელმწიფო ობლიგაციებში აბანდებენ. ბრიტანული გამოცემის ინფორმაციით, მსგავსი სქემით, 2013 წლიდან დღემდე, კვიპროსში 4 მილიარდი ევროს ინვესტიცია განხორციელდა.

კვიპროსი ევროკავშირის წევრი სახელმწიფოა, შესაბამისად, ქვეყნის მოქალაქეობის მქონე პირებს შესაძლებლობა აქვთ იცხოვრონ და იმუშაონ ევროგაერთიანების ნებისმიერ სახელმწიფოში.

გარდიანის ინფორმაციით, 2016 წელს, ამ მეთოდით, 400 პასპორტი გასცეს. მოქალაქეობის გაცემის პროცედურა, ცალკეული სამინისრტოების განკარგულებით, 2013 წლამდე, ნაკლებად გამჭვირვალედ ხდებოდა, რაც იმავე წლის ბოლოს მიღებული საკანონმდებლო ცვლილებებით, უფრო გამჭვირვალე გახდა. დღევანდელი მდგომარეობით, ქვეყნის მოქალაქეობა გაიცემა ბიზნესმენებზე, რომლებიც განახორციელებენ 2 მილიონი ევროს ინვესტიციას ქვეყნის უძრავი ქონების ბაზარზე, ან 2,5 მილიონი ევროს ინვესტირებას სახელმწიფოს ობლიგაციებსა და ადგილობრივ კომპანიებში. მოქალაქეობის მისაღებად არ არის აუცილებელი სახელმწიფო ენის ცოდნა.

გარდიანს ხელში ჩაუვარდა იმ ადამიანების სია, რომელთაც მსგავსი სქემით შეძლეს კვიპროსის მოქალაქეობის მიღება. გამოცემა არ ასახელებს კონკრეტულ სახელებს, თუმცა მათივე ინფორმაციით, ამ სიაში დიდი პოლიტიკური და ეკონომიკური გავლენების მქონე ადამიანები არიან. გამოცემა იუწყება, რომ ამ პირებს შორის მოხვდნენ უკრაინის ყველაზე მსხვილი კერძო ბანკის დამაარსებელი და რუსული დუმის წინა მოწვევის დეპუტატიც.