ამერიკელი კონგრესმენი ჯო უილსონი დიდი ბრიტანეთის მიერ ოცნების ხელისუფლების 4 მაღალჩინოსნისთვის ფინანსური და სამოგზაურო სანქციების დაწესებას X-ზე ეხმაურება.

ის მადლიერებას გამოხატავს ბრიტანელი მოკავშირეების მიმართ და წერს, რომ "ქართველი ხალხი გაიმარჯვებს. თავისუფალი და სამართლიანი არჩევნები წინსვლის ერთადერთი გზაა!"

"მადლიერი ვარ ჩვენი ბრიტანელი მოკავშირეების ივანიშვილის რეჟიმის გენერალური პროკურორის, შინაგან საქმეთა მინისტრის მოადგილისა და შინაგან საქმეთა ორი მაღალი თანამდებობის პირისთვის დაწესებული სანქციებისთვის. ქართველი ხალხი გაიმარჯვებს. თავისუფალი და სამართლიანი არჩევნები წინსვლის ერთადერთი გზაა!", — წერს უილსონი.

დღეს, 10 აპრილს დიდმა ბრიტანეთმა ქართული ოცნების ხელისუფლების ოთხი მაღალჩინოსანი დაასანქცირა.

დიდი ბრიტანეთის ფინანსური სანქციების განხორციელების სამსახურის (Office of Financial Sanctions Implementation) ვებგვერდის მიხედვით დასანქცირდნენ:

შალვა ბედოიძე — საქართველოს შინაგან საქმეთა მინისტრის მოადგილე;

მირზა კეზევაძე — შსს-ის განსაკუთრებულ დავალებათა დეპარტამენტის უფროსის მოადგილე;

კარლო კაციტაძე — სპეციალური საგამოძიებო სამსახურის უფროსი,

გიორგი გაბიტაშვილი — გენერალური პროკურორი.

სანქციები ითვალისწინებს აქტივების გაყინვას და სამოგზაურო აკრძალვას.

შეგახსენებთ, რომ მიმდინარე წლის 2 აპრილს დიდმა ბრიტანეთმა "სერიოზულ კორუფციულ საქმიანობაში ჩართვის გამო" თბილისის სააპელაციო სასამართლოს თავმჯდომარეს, მიხეილ ჩინჩალაძეს და იუსტიციის უმაღლესი საბჭოს წევრს, ლევან მურუსიძეს ფინანსური სანქციები დაუწესა. აღნიშნული სანქციები ითვალისწინებს ფინანსური სახსრების გაყინვას იმ პირებისთვის, რომლებიც არიან ან იყვნენ ჩართულნი სერიოზულ კორუფციაში.