24 მარტს, მთავრობის კანცელარიასთან ჭიათურელი მაღაროელების მხარდამჭერები შეიკრიბნენ. მაღაროელების კოლონა დღეს დილით დაიძრა ჭიათურიდან, კანცელარიასთან აქცია სწორედ მათ დააანონსეს.

7 მარტს ცნობილი გახდა, რომ ჭიათურა მენეჯმენტ კომპანიამ, ჯორჯიან მანგანეზთან შეთანხმებით, მიიღო გადაწყვეტილება, რომ ჭიათურაში მიწისქვეშა სამუშაოებს აღარ განაახლებს. მას შემდეგ, ჭიათურის მოსახლეობა უკვე 25-ე დღეა აქციებს მართავს.

• Chiatura Management Company ჭიათურაში მიწისქვეშა სამუშაოებს აღარ განაახლებს

მაღაროელ ტარიელ მიქაცაძეს განცხადებით მათ ჩამოაყალიბეს მოთხოვნები და სამოქმედო გეგმა, თუ როგორ შეძლებდნენ მთავრობასთან ერთად ამ პრობლემის გადაჭრას, მაგრამ მათ გამოხმაურება არ მიუღიათ.

მაღაროელების მოთხოვნები შემდეგია:

• ჯორჯიან მანგანეზმა ხელფასი 3 თვის დავალიანების მაღაროელებს დაურიცხოს;
• მთავრობა შეხვდეს პროტესტის მონაწილე მაღაროელებს;
• ჯორჯიან მანგანეზმა სრულად დატოვოს ჭიათურა და მთავრობამ გადაიბაროს პასუხისმგებლობა;
• მთავრობა დასხდეს მოლაპარაკების მაგიდასთან ჭიათურელ ხალხთან ერთად და სამომავლო გეგმებზე იმსჯელონ.

ტარიელ მიქაცაძემ ასევე დასძინა, რომ მოთხოვნების დაუკმაყოფილებლობის შემთხვევაში ისინი პროტესტს ჭიათუარასა და თბილისში გააგრძელებენ და "არ მისცემენ არავის იმის უფლებას, რომ ჭიათურაში ხალხი შიმშილობდეს და აქ უბრალოდ მთავრობის და კომპანიის წარმომადგენლები კაბინეტებში ისხდნენ და კომფორტულად გრძნობდნენ თავს".

"უკვე 25-ე დღეა რაც, ვაპროტესტებთ. ჭიათურაში უკვე 2 დიდი აქცია გვქონდა, რითაც მთავრობას ვაჩვენეთ ჩვენი ძალა და შესაძლებლობა სოციალურ პრობლემებთან დაკავშირებით. ჩამოვაყალიბეთ მოთხოვნები და დავსახეთ სამოქმედო გეგმა მთავრობასთან ერთად, როგორ შეიძლება ამ პრობლემების მოგვარება, თუმცა რამე გამოხმაურება არ მომხდარა. ამიტომ გადავწყვიტეთ, ჩამოვსულიყავით მთავრობის კანცელარიასთან მოგვეთხოვა ის, რაც ჭიათურას ეკუთვნის:

პირველი — 3 თვის დავალიანება ხელფასის დარიცხვა, რაც სასიცოცხლოდ მნიშვნელოვანია ჭიათურისთვის. დღეს ჭიათურა არის სრულიად შიმშილის ზღვარზე, როგორც მაღაროელს, ასე უჭირს მთლიანად ჭიათურას. ამიტომ საბანკო პრობლემებია ჭიათურაში მოსაგვარებელი სასწრაფოდ, სახელფასო პრობლემებია, სადაზღვეო და ა.შ.

ჩვენი მთავარი მოთხოვნაა, მთავრობა უნდა შეგვხვდეს, ჯორჯიან მანგანეზმა უნდა დატოვოს ჭიათურა, გადაიბაროს მთავრობამ მისი პასუხისმგებლობა და ამის შემდეგ დავსხდეთ მოლაპარაკების მაგიდასთან და რა არის გამოსავალი გზები და გამოსავალი გავიაროთ მათთან ერთად, თუ ამის სურვილი აქვთ. წინააღმდეგ შემთხვევაში ჩვენ სხვა გზა არ დაგვრჩება, აუცილებლად ვრჩებით აქაც, პროტესტი გრძელდება ჭიათურაში და არ მივცემთ არავის იმის უფლებას და მოსვენებას, რომ ჭიათურაში ხალხი შიმშილობდეს და აქ უბრალოდ მთავრობის და კომპანიის წარმომადგენლები კაბინეტებში ისხდნენ და კომფორტულად გრძნობდნენ თავს," — განაცხადა მაღაროელმა ტარიელ მიქაცაძემ.

პარალელურად, აქციაზე პოლიცია ორგანიზატორებს ხმის გამაძლიერებლის შეტანის უფლებას არ აძლევს. პოლიციის განცხადებით, დინამიკების შეტანა წინასწარ უნდა ყოფილიყო შეთანხმებული.

"შეურაცხყოფას მაყენებ, იმ საქციელით, რომ მე თუ ჩამოვდივარ ჭიათურიდან იმისთვის, რომ შიმშილი არის ქალაქში და მინდა ეგ ხმამაღლა ვთქვა და არ მაძლევ ამის საშუალებას — ეგ ხომ დამცირებაა?! — მიმართა აქციის მონაწილემ პოლიციელს.

ჭიათურელი მაღაროელები კანცელარიიდან ამ წუთებში მსვლელობით საზოგადოებრივი მაუწყებლისკენ მიდიან, სადაც საპროტესტო აქციას გააგრძელებენ.