საქართველოს ბანკი სამშენებლო და დეველოპერული სექტორის მხარდაჭერას განაგრძობს. ამჯერად, ბანკის ფინანსური ინვესტიციით, ჯინო ჰოლდინგი თბილისის ზღვაზე, ჯინო აკვაპარკის მიმდებარედ, საცხოვრებელ გამაჯანსაღებელ კომპლექს — თბილისის ბულვარს აშენებს.

პროექტი 30 ჰექტარ მიწაზე განაშენიანდება, მშენებლობის პირველი ფაზა 12 000 კვ.მ-ს მოიცავს და პირველი ეტაპის ჯამური ღირებულება 14.5 მლნ. დოლარია. საქართველოს ბანკის მიერ განხორციელებული ინვესტიცია კი 10.5 მილიონ დოლარს შეადგენს.

აღნიშნული კომპლექსი საცხოვრებელ ბინებს, 5*-იან სასტუმრო კომპლექსებს, აპარტ ჰოტელს, ბიზნეს ცენტრს, სამედიცინო და სარეაბილიტაციო-გამაჯანსაღებელ ცენტრს, აკვაპარკს, სავაჭრო ცენტრს, სამედიცინო კლინიკას, ღია ამფითეატრსა და სხვადასხვა გასართობ სივრცეს მოიცავს, მათ შორის: ფეხბურთის, კალათბურთის, რაგბის, პადელის, ჩოგბურთის მოედნებს, ველობილიკებს, სავარჯიშო დარბაზებსა და სხვა სივრცეებს. გარდა ამისა, კომპლექსის ტერიტორიაზე იგეგმება სკოლისა და საბავშვო ბაღის გახსნა. პროექტს ჯინო ჰოლდინგი ახორციელებს.

ქართულ დეველოპერულ ბაზარზე თბილისის ბულვარის პროექტი ადამიანებს აძლევს უნიკალურ შესაძლებლობას სრულიად ახალი, განუმეორებელი გარემოთი შეცვალონ ყოველდღიური სტრესითა და რუტინით დატვირთული ცხოვრება, თბილისის ზღვაზე უკვე დაიწყო თბილისის ბულვარის მშენებლობა, რომელიც გამოირჩევა ყველა იმ სიკეთით, რომლებიც ზღვას, უნიკალურ ტყე-პარკს, ეკოლოგიურად სუფთა და დაცულ გარემოს ახასიათებს.

კურორტზე ყველაფერია, რაც ადამიანის სრულფასოვანი ცხოვრებისთვისაა საჭირო. “ჩვენი მიზანია შევქმნათ ჯანსაღი გარემო, რომელიც მორგებულია, როგორც ურბანული ცხოვრების მოყვარულთათვის, ასევე მათთვის, ვინც ესწრაფვის მშვიდ, ოჯახურ იდილიას“, — განაცხადა ჯინო ჰოლდინგის დამფუძნებელმა, ნოდარ გიორგაძემ.

„საქართველოს ბანკი მრავალი წელია სამშენებლო და დეველოპერული სექტორის მხარდაჭერია და ჩვენი ჩართულობით, ამ მიმართულებით, არაერთი პროექტი განხორციელებულა, როგორც თბილისში, ისე რეგიონებში. ჩვენი დიდი ხნის პარტნიორი, ჯინო ჰოლდინგი საქართველოში კიდევ ერთ მასშტაბურ პროექტს — თბილისის ბულვარს ახორციელებს. აღნიშნული პროექტი სიახლეა ქართულ სამშენებლო ბაზარზე, რადგან ის მოიცავს, როგორც საცხოვრებელ, ისე საინვესტიციო, გასართობ, დასასვენებელ და გამაჯანსაღებელი ცენტრის მშენებლობას. აღსანიშნავია ისიც, რომ გარემოზე ნეგატიური ზემოქმედების შესამცირებლად, კომპანია მზის ენერგიის გამოყენებას გეგმავს, რისთვისაც თითოეული შენობის სახურავზე მზის პანელებს დაამონტაჟებს. ჩვენთვის მწვანე მიმართულება ერთ-ერთი პრიორიტეტულია და ამიტომ განსაკუთრებით საამაყოა, რომ მსგავსი პროექტის განხორციელებაში შეგვაქვს საკუთარი წვლილი. მიგვაჩნია, რომ თბილისის ბულვარი ქალაქის ერთ-ერთი სავიზიტო ბარათი გახდება და მას ხშირად ესტუმრებიან, როგორც ადგილობრივი, ისე საერთაშორისო ვიზიტორები. წარმატებებს ვუსურვებ გუნდს, ჩვენ კი არ ვჩერდებით და ვაგრძელებთ ბიზნესების გაძლიერებასა და მხარდაჭერას“. — განაცხადა ერეკლე ვაშაყმაძემ, საქართველოს ბანკის კორპორაციული გაყიდვების სექტორის უფროსმა.