"ბრიტანეთის თემთა პალატაში ბიძინა ივანიშვილისთვის სანქციების დაწესებაზე მსჯელობა არის შანტაჟი, რომელიც დაიწყო 3 წლის წინ, უკრაინაში ომის დაწყებასთან ერთად და გრძელდება ახლაც, ეს არავისთვისაა საინტერესო, უბრალოდ არის სამწუხარო რეალობა", — ამის შესახებ ოცნების პრემიერმინისტრმა ირაკლი კობახიძემ ჟურნალისტის კითხვის პასუხად განაცხადა, რომელიც ბრიტანეთის თემთა პალატაში ბიძინა ივანიშვილისთვის სანქციების დაწესებაზე მსჯელობას შეეხებოდა.

მთავრობის მეთაურის თქმით, ეს არავისთვის არის საინტერესო და უბრალოდ არის სამწუხარო რეალობა.

"ჯერ იყო დე-ფაქტო სანქციები, ახლა უკვე ფორმალური სანქციებით მუქარა და შანტაჟი. ეს არავისთვის არ არის საინტერესო, უბრალოდ არის სამწუხარო რეალობა, რასაც ხაზი უნდა გაესვას," — აღნიშნა კობახიძემ.

შეგახსენებთ, რომ 26 თებერვალს დიდი ბრიტანეთის მმართველი მმართველი ლეიბორისტული პარტიის წევრმა პერან მუნმა თემთა პალატაში გამართულ მოსმენაზე სახელმწიფო მინისტრს ჰკითხა, იგეგმება თუ არა სანქციების დაწესება ბიძინა ივანიშვილის:

"გასულ თვეში ევროპის საბჭოში შევხვდი რამდენიმე ქართველ ოპოზიციონერს. მათ მაჩვენეს სასტიკი ფიზიკური ძალადობების გრაფიკული მტკიცებულებები. ბიძინა ივანიშვილი, პუტინის მიერ მხარდაჭერილი ოლიგარქი და საქართველოს დე ფაქტო მმართველი, აგრძელებს მშვიდობიანი პროტესტის ჩახშობას რუსეთის იდენტური მოქმედების ხერხებით. ძალადობა და დაშინება აზიანებს პოლიტიკურ პროცესს. შეერთებულმა შტატებმა სანქციები დაუწესა ივანიშვილს, მაგრამ ივანიშვილის სიმდიდრის დიდი ნაწილი განთავსებულია გაერთიანებული სამეფოს ან ბრიტანეთის ზღვისიქითა ტერიტორიებზე. შეუერთდება თუ არა გაერთიანებული სამეფო ჩვენს მოკავშირეებს და გაუყინავს აქტივებს ასეთ საზიზღარ ტირანს?", – განაცხადა პერან მუნმა (ნეტგაზეთის თარგმანი).

სახელმწიფო მინისტრმა თქვა, რომ დიდი ბრიტანეთი აგრძელებს საქართველოში განვითარებადი სიტუაციის მჭიდრო მონიტორინგს, თუმცა ვერ გააკეთებს კომენტარს შესაძლო სამომავლო სანქციებზე, რადგან ეს შეამცირებს მათ გავლენას.

შეგახსენებთ, რომ გაერთიანებულმა სამეფომ უკვე დაუწესა სანქციები ქართული ოცნების შს მინისტრ ვახტანგ გომელაურს, მის პირველ მოადგილეს, ალექსანდრე დარახველიძეს, თბილისის პოლიციის დეპარტამენტის უფროს სულხან თამაზაშვილს, განსაკუთრებულ დავალებათა დეპარტამენტის უფროს ზვიად ხარაზიშვილსა ("ხარება") და მის მოადგილე მილერი ლაგაზაურს.

ამავე თემაზე: