უკრაინის საგარეო საქმეთა მინისტრი, ანდრიი სიბიჰა X-ზე პოსტს აქვეყნებს, რომელშიც ეხმაურება აშშ-ის პრეზიდენტ დონალდ ტრამპის მიერ გამოქვეყნებულ მიმართვას — ტრამპმა უკრაინის პრეზიდენტი, ვოლოდიმირ ზელენსკი მწვავედ გააკრიტიკა, უწოდა მას დიქტატორი და არჩევნების დანიშვნისკენ მოუწოდა.

"უკრაინამ ევროპის თანამედროვე ისტორიაში ყველაზე საშინელ სამხედრო თავდასხმასა და ტოტალური ომის სამ წელს გაუძლო. უკრაინელმა ხალხმა და პრეზიდენტმა ზელენსკიმ უარი განაცხადეს, დამორჩილებოდნენ პუტინის ზეწოლას. ვერავინ აიძულებს უკრაინას, რომ დანებდეს — ჩვენ დავიცავთ ჩვენს არსებობის უფლებას", — წერს სიბიჰა.