დღეს, ბაკურიანში ევროპის ახალგაზრდული ოლიმპიური ფესტივალი გაიხსნა, რომელიც 16 თებერვლამდე გაგრძელდება.

45 ქვეყნის ათასამდე სპორტსმენი რვა სახეობაში შეეჯიბრება ერთმანეთს, მათ შორის იქნებიან ქართველი მონაწილეებიც, რომლებიც სამ სახეობაში იასპარეზებენ. გახსნის ოფიციალური ცერემონია ცოტა ხნის წინ დასრულდა ბაკურიანში. პირველი არხი წერს, რომ ეს იყო ქართული ტრადიციული ელემენტებით დატვირთული სანახაობა და კულმინაცია – სპორტსმენების აღლუმი ხორუმის ფონზე, რისთვისაც სპეციალურად 30-წუთიანი მუსიკალური კომპოზიცია შეიქმნა.

ევროპის ოლიმპიური კომიტეტის პრეზიდენტმა, სპიროს კაპრალოსმა ევროპის ზამთრის ახალგაზრდული ოლიმპიური ფესტივალის გახსნის ღონისძიებაზე სიტყვით გამოსვლისას განაცხადა, რომ ევროპის ახალგაზრდული ოლიმპიური ფესტივალები უმნიშვნელოვანეს როლს ასრულებს ევროპის ოლიმპიურ მოძრაობაში.

"10 წლის წინ თბილისში გამართული ევროპის ახალგაზრდული ზაფხულის მე-13 ოლიმპიური ფესტივალის წარმატების შემდეგ ყოველთვის გვჯეროდა, რომ საქართველო კვლავ უმასპინძლებდა ჩვენი კონტინენტის ახალგაზრდა სპორტსმენებისთვის გამორჩეულ ღონისძიებას. უკვე ვგრძნობ, რომ ფესტივალის სული ცოცხალია და მკაფიოდ იგრძნობა აქ. უკვე შევესწარით საოცარ გამოსვლას, ვიხილეთ ჩვენი 45 მონაწილე ქვეყნის სპორტსმენთა აღლუმი, რაც წინასაასპარეზო მღელვარებას კიდევ უფრო აძლიერებს. ევროპის ახალგაზრდული ოლიმპიური ფესტივალები უმნიშვნელოვანეს როლს ასრულებს ევროპის ოლიმპიურ მოძრაობაში. ბევრი ჩვენი ახალგაზრდა სპორტსმენისთვის ეს პირველი საერთაშორისო მრავალდისციპლინარული შეჯიბრება იქნება, სადაც მათ შესაძლებლობა ექნებათ, გამოავლინონ თავიანთი თავი და გამოცადონ თავი ევროპის საუკეთესო სპორტსმენებთან. ჩვენი ევროპის ელჩების წყალობით, თქვენ მიიღებთ იმ ფასეულობას და სულისკვეთებას, რომელიც ჩვენ გვაერთიანებს, როგორც გასულ ზაფხულს პარიზში ვიხილეთ და მომავალ წელს კვლავ ვიხილავთ მილან კორტინაში, ოლიმპიზმის სული სპორტსმენებს მთელი კარიერის განმავლობაში თან სდევთ. სწორედ აქ იწყება ეს გზა. ყველა სპორტსმენს გისურვებთ წარმატებას თქვენს ასპარეზობებში და იმედი მაქვს, რომ ბაკურიანიდან შემდგარი და კმაყოფილი დაბრუნდებით", — განაცხადა სპიროს კაპრალოსმა.

ბაკურიანში ევროპის ახალგაზრდული ოლიმპიური ფესტივალი ოცნების პრემიერმა, ირაკლი კობახიძემ და ოცნების არჩეულმა პრეზიდენტმა, მიხეილ ყაველაშვილმა გახსნეს.