ოქროს გლობუსის სამგზის ლაურეატი ფილმი The Brutalist კრიტიკის ქარცეცხლში ეხვევა. რეჟისორ ბრედი კორბეის ისტორიული დრამა, რომელიც გასული წლის ერთ-ერთი ყველაზე განხილვადი ფილმი იყო, ხელოვნური ინტელექტის გამოყენების გამო ცხარე განხილვის საგნად იქცა.

ფილმის მემონტაჟემ, დავიდ იანჩომ, ცოტა ხნის წინანდელ ინტერვიუში აღნიშნა, რომ მთავარი როლის შემსრულებელი მსახიობების, ედრიენ ბროუდისა და ფელისიტი ჯოუნსის, შესრულების "გასაუმჯობესებლად" უკრაინული AI ტექნოლოგია, Respeecher, გამოიყენეს. უფრო ზუსტად, იანჩოს თქმით, ხელოვნური ინტელექტით მსახიობების უნგრულენოვანი დიალოგების ჟღერადობა დახვეწეს. თუმცა, ინტერვიუს გამოქვეყნებიდან მალევე ინტერნეტსივრცე ფილმის კრიტიკამ მოიცვა და ბევრმა ისიც კი განაცხადა, რომ ბრუტალისტი ყველა კინოდაჯილდოებიდან უნდა მოხსნილიყო.

კრიტიკული გამოხმაურების შემდეგ, ფილმის რეჟისორს განმარტების გაკეთება მოუწია. მისი თქმით, ხელოვნური ინტელექტით ედრიენისა და ფელისიტის შესრულება არ შეუცვლიათ.

"ისინი თვეების განმავლობაში მუშაობდნენ სპეციალისტთან, რათა აქცენტი გაეუმჯობესებინათ. ინოვაციური ტექნოლოგია კი მხოლოდ უნგრულენოვანი დიალოგების დასამუშავებლად იქნა გამოყენებული, უფრო ზუსტად, კონკრეტული ხმოვნებისა და ბგერების დასახვეწად. ინგლისურენოვანი ნაწილი არ შეცვლილა", — აღნიშნავს კორბეი, — "ეს ყველაფერი პოსტფროდაქშენის ეტაპზე ხელით გაკეთდა, ხმის დიზაინზე მომუშავე გუნდის მიერ და ტექნოლოგიის გამოყენებით. ჩვენი მიზანი კი სხვა ენაზე შესრულებული დიალოგის ავთენტიკურობის დაცვა გახლდათ".

ამავეს ამტკიცებს ფილმის მემონტაჟე. იანჩო, რომლისთვისაც უნგრული მშობლიური ენაა, ამბობს, რომ ანგლოსაქსური წარმომავლობის ადამიანებისთვის უნგრული სიტყვების წარმოთქმის სწავლა განსაკუთრებით რთულია, შეზღუდული დროისა და ბიუჯეტის პირობებში კი, ხელოვნური ინტელექტის გამოყენება ოპტიმალური არჩევანი იყო. პროცესის უფრო თვალნათლად წარმოსაჩენად, მემონტაჟე ჰყვება, რომ მსახიობებმა დიალოგები ჯერ საკუთარი ხმებით ჩაწერეს, მოგვიანებით კი, იანჩომ AI ტექნოლოგიას მოდელად თავისი უნგრულენოვანი საუბარი მიაწოდა.

"მსახიობების ნამუშევარს დიდი სიფრთხილით მივუდექით, [მათ დიალოგებში] მხოლოდ ბგერები შევცვალეთ. ამის გაკეთება თავადაც შეგიძლიათ ProTools-ში", — ამბობს იანჩო, — "ფილმში უნგრულენოვანი დიალოგების სიუხვის გამო კი, პროცესის დაჩქარება მოგვიწია, სხვა შემთხვევაში, ჯერ ისევ პოსტფროდაქშენის ეტაპზე ვიქნებოდით".

იანჩომ ისიც აღნიშნა, რომ ხელოვნური ინტელექტი ფილმის დასასრულს ნაჩვენები ნახატების ინსპირაციის წყაროდაც გამოიყენეს. თუმცა, თავად ესკიზები ხელით შესრულდა.

"კინოინდუსტრიაში ხელოვნურ ინტელექტზე საუბარი საჩოთიროდ ითვლება, მაგრამ ასე არ უნდა იყოს", — აცხადებს მემონტაჟე, — "ხელოვნური ინტელექტის შესაძლებლობებზე ღიად უნდა ვლაპარაკობდეთ. AI კინოში ისეთს არაფერს აკეთებს, რაც აქამდე არ გაკეთებულა. უბრალოდ, პროცესს აჩქარებს. ჩვენ კი ხელოვნურ ინტელექტს ისეთი მცირე დეტალებისთვის ვიყენებთ, რომლებისთვისაც დრო და ფული არ გვყოფნის".

ამასობაში, ბრუტალისტი ოსკარის არაერთი ნომინაციის მთავარ პრეტენდენტად მოიაზრება. ფილმმა რამდენიმე დღის წინ ოქროს გლობუსზე სამი ჯილდო აიღო: საუკეთესო მხატვრული ფილმის, საუკეთესო მსახიობი კაცისა (ედრიენ ბროუდი) და საუკეთესო რეჟისორის (ბრედი კორბეი) ნომინაციებში.

ფოტო: Polk / GG2025 / Penske Media / Getty

ბრუტალისტი აშშ-ის, გაერთიანებული სამეფოსა და უნგრეთის კოპროდუქციაა. ფილმის მთავარი გმირი გამოგონილი არქიტექტორი, უნგრელი ებრაელი ლასლო ტოტია, რომელიც ჰოლოკოსტს გადაურჩება და აშშ-ში "ამერიკული ოცნების" ასახდენად გაემგზავრება. კორბეის ნამუშევრის პრემიერა გასული წლის ვენეციის კინოფესტივალზე შედგა, სადაც რეჟისორმა ვერცხლის ლომის ჯილდო დაიმსახურა, თავად ბრუტალისტი კი ამერიკულმა კინოინსტიტუტმა 2024 წლის 10 საუკეთესო ფილმს შორის დაასახელა.

ასევე იხილეთ:

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...