ნაციონალური მოძრაობის ხელისუფლების საქმიანობის შემსწავლელი საგამოძიებო კომისიის მუშაობაში ოპოზიციის სტატუსით ოცნების ხელისუფლების მხარდამჭერი პარტია ხალხის ძალის დეპუტატები ჩაერთვებიან. ამის შესახებ ხალხის ძალის ლიდერმა, გურამ მაჭარაშვილმა განაცხადა.

"მანამ, სანამ კოლექტიური ნაცმოძრაობის გასამართლება და მისი პოლიტიკიდან ჩამოშორება არ მოხდება, ქვეყანას არაფერი ეშველება. ეს უკვე დაადგინა პრაქტიკამაც და საერთაშორისო სასამართლოების გადაწყვეტილებებმაც, სადაც პირდაპირ წერია, რომ კოლექტიური ნაცმოძრაობის ხელისუფლების დროს, სისტემურ დანაშაულებს სჩადიოდნენ.

რა თქმა უნდა, ჩვენ ამ საგამოძიებო კომისიაში მონაწილეობას მივიღებთ, როგორც საპარლამენტო ოპოზიციის წარმომადგენლები და 6 თვის თავზე, ბევრი გამოძიება არ დასჭირდება იმას, რომ კოლექტიური ნაცმოძრაობა დამნაშავე პოლიტიკური ორგანიზაციაა", — განაცხადა მაჭარაშვილმა

მამუკა მდინარაძის თქმით, 2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებითი საგამოძიებო კომისია საგაზაფხულო სესიის პირველი კვირაში შეიქმნება, 6 თვე იმუშავებს და მოამზადებს დასკვნას, რომელსაც საქართველოს პარლამენტი სექტემბრის პირველი სასესიო კვირისათვის განიხილავს და დაამტკიცებს.