პროევროპული აქციების პერიოდში დაკავებული ვეფხია კასრაძის ადვოკატმა, კახა კოჟორიძემ მოსამართლე ირაკლი ხუსკივაძის აცილების შუამდგომლობა დააყენა.

მოგვიანებით ირკვევა, რომ მოსამართლე ხუსკივაძემ შუამდგომლობა არ დააკმაყოფილა და განაცხადა, რომ "მოსამართლის აცილების შუამდგომლობა არის დაუსაბუთებელი, უსაფუძვლო"

მოსამართლის თავიდან აცილების შუამდგომლობის დაყენებაზე მოთხოვნა იმის შემდეგ წამოვიდა, რაც კოჟორიძის განცხადებით, კასრაძის მიმართ აღკვეთის ღონისძიებად გამოყენებული პატიმრობა იყო დაუსაბუთებელი, მიუხედავად იმისა, რომ არ არსებობდა ამ პატიმრობის სამართლებრივი საფუძველი და არგუმენტი.

ადვოკატის თქმით ეს ეჭვებს აჩენს, რომ მოსამართლე არის მიკერძოებული, არ არის დამოუკიდებელი და რომ ის დღესაც ვერ მიიღებს მიუკერძოებელ გადაწყვეტილებას.

შეგახსენებთ, დღეს, თბილისის საქალაქო სასამართლოში, პროევროპული აქციების დროს დაკავებული 8 მოქალაქის აღკვეთის ღონისძიების შეცვლის საკითხი განიხილება.

ჯგუფური ძალადობის ორგანიზების ბრალდებით დაკავებულები არიან: ვეფხია კასრაძე, ზვიად ცეცხლაძე, ვასილ კაძელაშვილე, გიორგი გორგაძე, ირაკლი მიმინოშვილე, ინსაფ ალიევი, თორნიკე გოშაძე და ნიკოლოზ ჯავახიშვილი. ყველა მათგანს პატიმრობა აქვს შეფარდებული.

მათ აღკვეთის ღონისძიების სახით პატიმრობა სწორედ მოსამართლე ირაკლი ხუსკივაძემ შეუფარდა.