საგარეო საქმეთა მინისტრმა მიხეილ ჯანელიძემ ბუდაპეშტში აღმოსავლეთ პარტნიორობის ქვეყნების საგარეო საქმეთა მინისტრების შეხვედრისას, პრეს-კონფერენციაზე განაცხადა, რომ ნოემბრის სამიტი ახალ იმპულსს შესძენს აღმოსავლეთ პარტნიორობას და ხელს შეუწყობს პრაქტიკულ შედეგებზე ორიენტირებული თანმშრომლობის შემდგომ გაღრმავებას. ამის შესახებ ინფორმაციას საგარეო საქმეთა სამინისტრო ავრცელებს:

"ხვალ სამი წელი სრულდება ასოცირების შეთანხმების და თავისუფალი ვაჭრობის შესახებ შეთანხმების ამოქმედებიდან. აღმოსავლეთ პარტნიორობამ საქართველოს ბევრი რამ მისცა, აღნიშნული შედეგები კი ქვეყნისთვის ევროკავშირში სიღრმისეული ინტეგრაციის ახალ პერსპექტივებს ხსნის. დარწმუნებული ვართ ევროკავშირთან ყოვლისმომცველი დაახლოების პროცესი სიღრმისეული ინტეგრაციის ახალ პერსპექტივებს გაგვიხსნის. რა თქმა უნდა ჩვენი საბოლოო მიზანი არის ევროკავშირის სრულფასოვანი წევრობა".

მიხეილ ჯანელიძემ ასევე აღნიშნა, რომ აღმოსავლეთ პარტნიორები მნიშვნელოვან როლს თამაშობენ ევროკავშირის ეკონომიკური, ენერგეტიკული თუ ფიზიკური უსაფრთხოების უზრუნველყოფის პროცესში.

უწყების ცნობით, 31 აგვისტოს ბუდაპეშტში გამართული პლენარული სესია მთლიანად დაეთმო აღმოსავლეთ პარტნიორობის ნოემბრის სამიტს.