მეგობარ ქვეყნად მიჩნეული აზერბაიჯანისთვის დროული ბოდიშის მოხდა და ამის შესახებ საზოგადოების ინფორმირება -— ეს ყველაფერი იყო ზომები და ნაბიჯები, რაც უნდა გადადგმულიყო, — ამის შესახებ აზერბაიჯანის პრეზიდენტმა, ილჰამ ალიევმა მომხდარი ავიაკატასტროფის შესახებ განაცხადა. მისი თქმით, სამწუხაროდ, პირველი სამი დღე რუსეთიდან აბსურდული თეორიების გარდა არაფერი ისმოდა.

"ჩვენთვის კიდევ ერთი სამწუხარო და გასაკვირი მომენტი იყო ის, რომ რუსეთის ოფიციალურმა უწყებებმა წამოაყენეს თეორიები თვითმფრინავში ბალონების აფეთქების შესახებ. ანუ ეს ნათლად აჩვენებს, რომ რუსულ მხარეს სურდა ამ საკითხის მიჩქმალვა რაც, რა თქმა უნდა, შეუფერებელი საქციელია. რა თქმა უნდა, ჩვენი თვითმფრინავის ჩამოვარდნა შემთხვევით მოხდა. რა თქმა უნდა, აქ მიზანმიმართულ ტერორისტულ აქტზე საუბარი არ შეიძლება. ამიტომ, დანაშაულის აღიარება, მეგობარ ქვეყნად მიჩნეული აზერბაიჯანისთვის დროული ბოდიშის მოხდა და ამის შესახებ საზოგადოების ინფორმირება - ეს ყველაფერი იყო ზომები და ნაბიჯები, რაც უნდა გადადგმულიყო. სამწუხაროდ, პირველი სამი დღე რუსეთიდან აბსურდული თეორიების გარდა არაფერი გვსმენია", — განაცხადა ილჰამ ალიევმა.

შეგახსენებთ, 25 დეკემბერს ყაზახეთის ქალაქ აქთაუში აზერბაიჯანის ავიახაზების თვითმფრინავის ჩამოვარდნის შედეგად 38 ადამიანი დაიღუპა. ბორტზე 67 ადამიანი იმყოფებოდა. გავრცელებული ინფორმაციით, წინასწარმა გამოძიებამ დაადასტურა, რომ ავიაკატასტროფა რუსულმა მიწა-ჰაერის ტიპის რაკეტამ გამოიწვია.

28 დეკემბერს, კრემლის პრესსამსახურმა გაავრცელა ინფორმაცია იმის შესახებ, რომ ვლადიმერ პუტინმა ილჰამ ალიევს, აზერბაიჯანის ავიახაზების თვითმფრინავის ჩამოვარდნის გამო, ბოდიში მოუხადა.