ლიეტუვის პრეზიდენტი, გიტანას ნაუსედა, X-ზე პოსტს აქვეყნებს, რომელშიც ამბობს, რომ საქართველოს პრეზიდენტთან, სალომე ზურაბიშვილთან სატელეფონო საუბარი გამართა. ნაუსედა აღნიშნავს, რომ შეშფოთება გამოთქვა საქართველოში მიმდინარე პროცესების შესახებ და უპირობოდ დაუჭირა მხარი ქართველი ხალხის ბრძოლას. ლიეტუვის პრეზიდენტმა აღნიშნა ისიც, რომ საქართველო ბელარუსის სცენარის განმეორების რისკის წინაშე დგას.

"ახლახან ვესაუბრე ტელეფონზე პრეზიდენტ ზურაბიშვილს. გამოვთქვი ჩემი ღრმა შეშფოთება საქართველოს დემოკრატიული უკუსვლით. ლიეტუვა მტკიცედ უჭერს მხარს ევროპარლამენტის რეზოლუციას საქართველოში დემოკრატიული არჩევნების ჩატარების შესახებ.

ლიეტუვა მტკიცედ დგას ქართველი ხალხის გვერდით ევროკავშირისკენ მიმავალ გზაზე. ევროკავშირში გაწევრების მოლაპარაკებების შეჩერება მათი ნების წინააღმდეგ წასვლა და რუსეთის სასარგებლო ნაბიჯია", — ვკითხულობთ გიტანას ნაუსედას პოსტში.