დღეს, 18 დეკემბერს, 19:00 საათზე მრავალფეროვნების მარში გაიმართება. ინფორმაციას სოლიდარობის პლატფორმა ავრცელებს.

"18 დეკემბერს, 19:00 საათზე პირველი რესპუბლიკის მოედნიდან პარლამენტამდე ვმართავთ მრავალფეროვნების მარშს.

მრავალფეროვნების მარშის ქვეშ საქართველოში მცხოვრები სხვადასხვა რელიგიური და ეთნიკური ჯგუფების წარმომადგენლები ვერთიანდებით და გვინდა ჩვენი ხმა და ძალისხმევა შევუერთოთ იმ საერთო საქმეს, რომელიც ცდილობს შეაკავოს ჩვენს ქვეყანაში ავტორიტარიზმის გაღრმავება და ევროინტეგრაციის გზიდან გადახვევა. ჩვენი, როგორც ამ ქვეყნის მოქალაქეების, ვალია გავიზიაროთ ჩვენი სამშობლოს ტკივილი და შევიტანოთ აქტიური წვლილი ახალ ეროვნულ მოძრაობაში, რომელიც თავისუფლებისთვის, სამართლიანობისთვის და ღირსეული მომავლისთვის იბრძვის.

ჩვენ კარგად გვესმის, რას ნიშნავს ავტორიტარიზმში ცხოვრება, რადგან პოლიტიკური სისტემა ეთნიკური და რელიგიური უმცირესობების მიმართ მაშინაც მჩაგვრელი და უსამართლო იყო, როცა ჩვენი მოსახლეობის უფრო დიდი ნაწილი ამას ჯერ კიდევ ვერ გრძნობდა. ჩვენი თემები არა ერთხელ გამხდარან პოლიტიკური კონტროლის, დისკრიმინაციისა და შევიწროების სამიზნე, მაგრამ ჩვენ არასდროს დაგვიკარგავს უფრო სამართლიანი მომავლის რწმენა. ჩვენ გვჯეროდა, რომ საქართველოს ევროკავშირში გაწევრიანების პროცესი არადომინანტური ჯგუფებისთვისაც მოიტანდა უსაფრთხოებას, კეთილდღეობას და თანასწორობას, და იგი უფრო სამართლიანი და თანასწორი საქართველოს მშენებლობის იმედს გვაძლევდა. სწორედ ამიტომ ევროინტეგრაციის პროცესის მიზანმიმართული დაზიანება და შეჩერება ხელისუფლების მხრიდან ჩვენთვის განსაკუთრებით უსამართლო და მიუღებელი გადაწყვეტილებაა.

ევროპული მომავლის დაკარგვის საფრთხის მიღმა, ჩვენთვის უმძიმესი პრობლემა და ტკივილია პოლიტიკაში ძალადობის, როგორც მართვის ლოგიკის დაბრუნება. პოლიციამ ჩვენი მშვიდობიანი შეკრებები უკანონოდ დაარბია, შეკრების მონაწილეები სასტიკად სცემა, უმოწყალოდ მოეპყრო და აწამა. მათ შორის არის ჩვენი არაერთი თემის წევრი, რომლებიც უკანონო პატიმრობისა და ძალადობის მსხვერპლები გახდნენ ამ დღეებში. გვაქვს განცდა, რომ მოქალაქეების უსაფრთხოება, თავისუფლება და თანასწორობა, როგორც სახელმწიფოს მთავარი პრინციპი, დაკარგულია და ამ უსამართლო პროცესს ახალი მსხვერპლები და სამიზნეები ეყოლება. ავტორიტარიზმის აღმასვლა შეეხება ყველას, ვისი მსხვერპლად შეწირვაც სისტემას მოუნდება. ძალადობა, დამორჩილება და კონტროლი მოვა ყველა ოჯახში, სამეზობლოში, თემში, სოფელსა და ქალაქში.

დღეს ჩვენ ვუერთდებით იმ ორ საერთო მოთხოვნას, რომელიც არსებული პოლიტიკური კრიზისიდან გამოსვლის გზად ჩვენ, მოქალაქეებმა დავსახეთ. პირველი პირობაა დაპატიმრებული პირების დაუყოვნებლივ გათავისუფლება და დამნაშავე პოლიციელებისა და მათი ხელმძღვანელების დასჯა; მეორე პირობა კი ახალი არჩევნებია, რომელიც ამ კრიზისიდან ყველაზე მშვიდობიანი და დემოკრატიული გამოსვლის გზად გვესახება.

#თავისუფლება რეჟიმის მძევლებს!

#ყველგან პოლიცია, არასად სამართალი!

#ავტორიტარიზმი კლავს თანასწორობასაც!

#მრავალფეროვნებაშია სიმდიდრე, და არა ოლიგარქიაში!

#გაუმარჯოს ერთიან, მრავალფეროვან და სამართლიან საქართველოს!", — ნათქვამია გავრცელებულ ინფორმაციაში.