10 დეკემბერს, რუსთაველის გამზირზე, მაკდონალდსთან დაკავებული გიორგი ნადარაიას საქმე ადმინისტრაციულიდან სისხლის სამართლის დანაშაულად გადააკვალიფიცირეს. როგორც NEWS.On.ge-სთან გიორგი ნადარაია ამბობს, ის 5-6-ჯერ იყო აქციებზე, მაგრამ 10 დეკემბერს აქციიდანაც კი არ მოდიოდა, მეგობარ გოგოსთან ერთად კინოში, შემდეგ მაკდონალდსი, როცა პოლიციამ ჩხრეკის მიზნით გააჩერა და დააკავა.

11 დეკემბერს გაიმართა სასამართლო, სადაც ისიც კი ვერ დამტკიცდა, რომ მან პოლიციას წინააღმდეგობა გაუწია ან შეურაცხყოფა მიაყენა. ამის შემდეგ მას მოსამართლემ მას გაფრთხილება მისცა და გამოუშვეს.

დრეს, 12 დეკემბერს პირადი ნივთების — ტელეფონის და მანქანის გასაღების წამოსაღებად მისულს კი უთხრეს, რომ მასზე საქმე სისხლის სამართლის მუხლითაა აღძრული.

გიორგი ეჭვობს, რომ შესაძლოა მანქანაში რაიმე ჩაუდონ.

"მგონი 10 რიცხვი იყო რომ დამაკავეს, მაკდონალდსიდან გამოვედით მე და ჩემი შეყვარებული. ამ დროს, მოვიდა პოლიცია, ჩხრეკა დაიწყეს, ჯიბეებში ხელის ჩაყოფა და მთელი ამბები. ამ დროს იქვე იყო ერთ-ერთი ჟურნალისტი, რომელმაც ამ ყველაფრის გადაღება დაიწყო. პოლიცია ჟურნალისტს მიუვარდა, ტელეფონი წაართვეს და გადაღების უფლება არ მისცეს. შემდეგ ხელი დამადეს, რომ ეს ადამიანი წაიყვანეთო და პოლიციის მანქანით გადამიყვანეს განყოფილებაში.

სასამართლოში მე ჩემს ადვოკატს ყველანაირი მტკიცებულება გვქონდა, რომ მე უდანაშაულო ვიყავი. მოწმეები ამბობდნენ, ვინც დაკავებას შეესწრნენ, რომ არ უგინებია, თავის ნებით გაჰყვაო და ოქმში პირიქით დაწერეს. ვიდეოშიც ჩანს, „მთავარი არხიც“ გვერდზეც იდო, რომ ხელგადახვეული მივყვებოდი პოლიციელებს და არანაირი წინააღმდეგობა არ გამიწევია, ვსაუბრობდით. მანქანაში მშვიდობიანად ჩავჯექი. ჩემი მეგობრის ვიდეომტკიცებულება გვქონდა, რომ არანაირ შეურაცხყოფას არ ვაყენებდი პოლიციას და არ ვძალადობდი არავისზე, მშვიდად ვიდექი ერთ ადგილზე. ეს ყველაფერი ნახა მოსამართლემ, მაგრამ მაინც ჩემს საწინააღმდეგო მიიღო გადაწყვეტილება, ყველაზე მსუბუქი ფორმით, მაგრამ მაინც — გაფრთხილება მომცა და გამომიშვეს.

მეორე დრეს ნივთების ასაღებად მივედი, გუშინ არ მომცეს, მითხრეს, რომ გამომძიებელს ჰქონდა სეიფში. დღეს რომ მივედი, სისხლის სამართალზეა გადაცემული თქვენი საქმე და თქვენს ნივთებს ვერ მოგცემთო. ჩემი ნივთები კი არის ტელეფონი და მანქანის გასაღები.

ამ ადამიანებს, ვფიქრობ, რაღაცის ჩადება უნდოდათ ჩემთვის, მაგრამ მე პროფესიონალი სპორტსმენი ვარ და როცა ეს გაიგეს, ვერ ჩამიდეს ვერაფერი, მაგრამ რაკი ახლა ჩემი მანქანის გასაღები აქვთ, ვფიქრობ, რომ შეიძლება ჩემი მანქანაში რაღაც ჩადონ, ახლა ჩაატარონ ჩემი მანქანის ჩხრეკა და იქ რაღაც აღმოჩნდეს.აქტიურად არ დავდიოდი აქციებზე, 5-6-ჯერ ვიყავი, რამდენიმე საათით ვიდექი, იმ ღამეს აქციიდან არ მოვდიოდით. არც იცოდნენ,რ ომ აქციიდან არ მოვდიოდი, კინოდან მოვდიოდი, "სქრინებიც" ვაჩვენე მოსამართლეს.

ახლა სისხლის სამართალია აღძრული და გამოძიება მიმდინარეობს. ახლა მივდივარ ადვოკატთან რომ დეტალები გავარკვიო.