საქართველოს 40-მდე ქალაქში მიმდინარე უწყვეტი პროტესტის ფონზე, როცა "ქართული ოცნების" რეჟიმის დასრულების მოთხოვნით მხოლოდ თბილისში ყოველდღე 100 000 ადამიანზე მეტი იკრიბება, იფიცებიან საჯარო მოხელეები, უნივერსიტეტები, მასწავლებლები და მოსწავლეები, მმართველმა პარტიამ მასიური რეპრესიები დაიწყო.

სისტემასთან მებრძოლ ადამიანებს პოლიცია სახლში აკითხავს. კანონების დარღვევით მიმდინარეობს ჩხრეკა, ძალის გადამეტებით აკავებენ ოპოზიციურ ლიდერებსა და აქტივისტთა ჯგუფების ლიდერებს. ამ რეალობასთან ბრძოლის ერთადერთი გზა ინფორმირებულობაა.

გთავაზობთ იურისტი საბა ბრაჭველის რჩევებს იმ შემთხვევისთვის, თუ პოლიცია თქვენს კარსაც მოადგება.

პირად ჩხრეკებზე:

  • თუ სახლში მოგადგნენ და აკაკუნებენ, არ შეშინდეთ და დაპანიკდეთ, დარეკეთ ცხელ ხაზზე 577070563;
  • სანამ კარს გააღებთ, გადით ლაივში (გაქვთ ამის უფლება). ვიდეოს ლაივი ჯობია, რადგან ვერ წაგიშლიან
  • არ დააწყებინოთ ჩხრეკა, სანამ ადვოკატი არ მოვა. რაღაც ეტაპზე კარის გაღებას მოგთხოვენ, მაგრამ ეცადეთ, ადვოკატისთვის დრო მოიგოთ
  • შეგიძლიათ ასევე მოსთხოვოთ ჩხრეკის დადგენილების/განჩინების გაცნობა
  • ჩხრეკის მიმდინარეობისას მაქსიმალურად ეცადეთ, არ დაუშვათ, რომ სხვადასხვა ოთახებში იბოდიალონ პოლიციელებმა (ლაივის გამოყენებით. თუ გაბოდიალდებიან, ეგ მაინც კარგი მტკიცებულება იქნება)
  • პირდაპირ არ გაუღოთ კარი ან საერთოდ არ გაუღოთ 'გაზის ინსპექტორს', რომელიც მოულოდნელად გეწვიათ, ან მეზობელს, რომელსაც ნიორი შემოაკლდა დილის 7 საათზე. იყავით ყურადღებით.


ციფრული ჰიგიენა:

  • წაშალეთ სიგნალის აპლიკაცია და ხელახლა გადმოწერეთ
  • სიგნალის გარეთ თუ ლაპარაკობთ სადმე, წაშალეთ
  • საფუძვლიანი წაშლისთვის ყველა მონაცემის - iShredder (აიფონისთვის)
  • სამსახურის ლეპტოპები დატოვეთ სამსახურში, პირადი ლეპტოპები არ წაიღოთ ოფისებში
  • ვინც ოფისებში დადიხართ, ზედმეტი ნივთები მოაშორეთ ოფისებიდან. Clean desk policy.
    რაც მთავარია - იყავით მხნედ - პოლიციელები არიან დემენტორები და შიშს ყნოსავენ ხოლმე. ჩხრეკები ჯერ-ჯერობით სისხლის წესით დაკავებების გარეშე მიმდინარეობს