ისრაელის პრემიერმინისტრმა ბენიამინ ნეთანიაჰუმ ჰეზბოლასა და ისრაელს შორის მიღწეულ ცეცხლის შეწყვეტის შეთანხმებაზე ისაუბრა. მისი განმარტებით, ცეცხლის შეწყვეტის შეთანხმება ისრაელისთვის სამი მიზეზის გამოა მნიშვნელოვანი: ირანის მხრიდან მომდინარე საფრთხეზე ფოკუსირებისთვის, ისრაელის ძალებისთვის ამოსუნთქვის საშუალების მისაცემად და მარაგების შესავსებად და ჰამასის იზოლაციისთვის.

"ვინარჩუნებთ სამხედრო მოქმედების სრულ თავისუფლებას. თუ ჰეზბოლა დაარღვევს შეთანხმებას და შეეცდება შეიარაღებას, თავს დავესხმებით. თუ საზღვართან ახლოს ტერორისტული ინფრასტრუქტურის აღდგენას შეეცდება, თავს დავესხმებით. თუ რაკეტას გაუშვებს, თუ გვირაბს გათხრის, რაკეტების გადამტან სატვირთო მანქანას შემოიყვანს, თავს დავესხმებით. სურათიდან ჰეზბოლას ჩამოშორებით, ჰამასი მარტო რჩება. გავზრდით ზეწოლას და ეს დაგვეხმარება ჩვენი წმინდა მისიის განხორციელებაში, ჩვენი მძევლების გათავისუფლებაში. არაერთხელ მითქვამს, კარგი შეთანხმება არის შეთანხმება, რომელიც აღსრულდება და ჩვენ მას აღვასრულებთ", — აღნიშნა ბენიამინ ნეთანიაჰუმ.

ისრაელი და ჰეზბოლა შეერთებული შტატებისა და საფრანგეთის შუამავლობით ცეცხლის შეწყვეტაზე შეთანხმდნენ. მხარეებს შორის ცეცხლის შეწყვეტის შეთანხმება ძალაში უკვე შევიდა.