პატიმრობაში მყოფმა საქართველოს მესამე პრეზიდენტმა, მიხეილ სააკაშვილმა სასამართლო სხდომაზე, რომელსაც კლინიკა "ვივამედიდან" დისტანციურად ჩაერთო, განაცხადა, რომ იგი ტრამპის ადმინისტრაციის ხალხს "კარგად იცნობს და მათი მხარდაჭერა ექნება".

როგორც სააკაშვილმა აღნიშნა, იგი იმედს არ კარგავს, და ბრძოლას იქამდე აპირებს, სანამ "პირში სული უდგას, სანამ აზროვნება შეუძლია და სანამ კიდევ სიცოცხლის ნიშანი შერჩენია", რადგან როგორც იგი ამბობს, საქართველოსა და უკრაინის ბედი წყდება.

"მე ვარ ჩამოცილებული ჩემ შვილებს, მე ვარ ჩამოცილებული ჩემ სახლს, მე ვარ ჩამოცილებული საქართველოსაც და უკრაინასაც, მაგრამ მე ერთი წამითაც არ დავკარგავ ბრძოლის ჟინს, სანამ პირში სული მიდგას, სანამ აზროვნება შემიძლია და სანამ კიდევ სიცოცხლის ნიშანი შემრჩენია იმიტომ, რომ აქ ყველაფერი წყდება, წყდება საქართველოს ბედი, წყდება უკრაინის ბედი, წყდება ჩვენი თავისუფლების და წყდება ჩვენი ყოფნა-არყოფნის ბედი", — განაცხადა სააკაშვილმა. მანვე ამ კონტექსტში აღნიშნა, რომ "რაც საუკუნეების განმავლობაში არ მომხდარა, დღევანდელ სამყაროში, ქართველი, როგორც ერი გაქრება. მეორე და მესამე თაობა შეიძლება ქართველები აღარ იყვნენ უკვე".

სააკაშვილის თქმით, მნიშვნელოვანია ერთიანობა და დიდი იმედი აქვს უცხოეთის, მათ შორის, ტრამპის ადმინისტრაციის მხარდაჭერის.

"ამიტომ ერთიანობა, ერთობლივი სრული ძალისხმევა — სამოქალაქო სექტორის, ახალგაზრდობის, ყველა პოლიტიკური პარტიის ვისაც მართლაც სამშობლო უყვარს, ყველანაირი ბრაზის და ბოღმის გვერდზე გადადება [მნიშვნელოვანია] და ეს ყველაფერი მოხერხებულია და ასეც არის. ახლა, მთავარია ცოტა კიდევ მეტი გამბედაობა, კიდევ მეტი მიწოლა, კიდევ მეტი ბრძოლისუნარიანობის ჩვენება და მე, დარწმუნებული ვარ, რომ უცხოეთის მხარდაჭერაც გვექნება სწორედ ამ პირობებში. ტრამპის ახალი ადმინისტრაციის მხარდაჭერა გვექნება სწორედ ამ პირობებში.მე ძალიან კარგად ვიცნობ იმ ხალხს, ვინც ახლა მოდის ადმინისტრაციაში ამერიკაში და ისინი თავისუფლების მხარეს არიან და იქნებიან, როდესაც შენ თვითონ გაქვს ამ თავისუფლებისთვის ბრძოლის თავი, თუ არა და ორ წუთში მოგიშორებენ. ამიტომ ახლა, ჩვენი ამოცანაა, რომ ვიბრძოლოთ", — განაცხადა სააკაშვილმა.