საქართველოში ევროკავშირის ელჩი, პაველ ჰელჩინსკი, 26 ოქტომბერს, საქართველოში ჩატარებულ საპარლამენტო არჩევნებთან დაკავშირებით, არასამთავრობო ორგანიზაციებს შეხვდა.

შეხვედრა გაიმართა ევროკავშირის წარმომადგენლობის ოფისში და მას საერთაშორისო გამჭვირვალობა — საქართველო, სამართლიანი არჩევნები (ISFED) ჩემი ხმა და საქართველოს ახალგაზრდა იურისტთა ასოციაცია (საია) ესწრებოდნენ.

არასამთავროებმა შეხვედრის დასრულების შემდეგ განაცხადეს, რომ მათ ჰერჩინსკის საარჩევნო დარღვევების მტკიცებულებები წარუდგინეს და ელჩთან საუბრისას მესამე სექტორის მხრიდან აღინიშნა, რომ ძალიან მნიშვნელოვანია, საქართველოს მოქალაქეები არ შეურიგდნენ ამ უსამართლობას.

"ჩვენი დასავლელი პარტნიორები კარგად არიან ინფორმირებულები რა ხდებოდა არჩევნების დღეს და უკვე საუბარია იმაზე, თუ რა შეიძლება გაკეთდეს და როგორ მივდივართ წინ.

ჩვენ ვსაუბრობდით იმაზე, რომ, რა თქმა უნდა, ძალიან მნიშვნელოვანია, რომ საქართველოს მოქალაქეები არ შეურიგდნენ ამ უსამართლობას და, რა თქმა უნდა, ჩვენ გავაგრძელებთ საქართველოს ევროპული მომავლისთვის ბრძოლას. რა თქმა უნდა, ბრიუსელშიც იქნება დისკუსიები ამ საკითხთან დაკავშირებით", – განაცხადა საერთაშორისო გამჭვირვალობა – საქართველოს აღმასრულებელმა დირექტორმა, ეკა გიგაურმა.

ამასთან, ევროკავშირის ელჩთან შეხვედრაზე საუბარი იმასაც შეეხებოდა, თუ რა უნდა გააკეთოს საერთაშორისო საზოგადოებამ საპარლამენტო არჩევნების გამოძიებისთვის ხელის შესაწყობად.

"ევროკავშირის ელჩთან ჩვენ დღეს ვისაუბრეთ არჩევნების დღეს მომხდარ დარღვევებზე. ჩვენ ასევე საუბარი გვქონდა იმაზე, თუ რა ნაბიჯები შეიძლება გადადგას საქართველოს ხელისუფლებამ დარღვევების გამოძიებასთან დაკავშირებით, გვაქვს თუ არა იმედი, რომ პროკურატურა ყველაფერს გამოიძიებს და ასევე, რა უნდა გააკეთოს საერთაშორისო საზოგადოებამ, მათ შორის, განსაკუთრებით ევროკავშირმა და ევროკავშირის წევრმა ქვეყნებმა იმისთვის, რომ დაეხმარონ ამ პროცესს და ხელი შეუწყონ ამ გამოძიებას საქართველოში. რეალურად მათ აინტერესებდათ ის დარღვევები, ის არგუმენტები, რაც ჩვენ გვქონდა

[საერთაშორისო ჩართულობის] ფორმატზე, სამწუხაროდ, არ გვისაუბრია. ერთადერთი იმას გეტყვით, რომ ეს არის წევრი სახელმწიფოების გადასაწყვეტი შექმნიან თუ არა მექანიზმს და ალბათ ამას უახლოეს პერიოდში გავიგებთ", — განაცხადა საიას წარმომადგენელმა, ნანუკა ყრუაშვილმა.