კატარი აშშ-ს მოთხოვნას დათანხმდა და მომდევნო კვირების განმავლობაში ქვეყნიდან პალესტინური ტერორისტული დაჯგუფება ჰამასის ლიდერებს გააძევებს. ინფორმაციას CNN ავრცელებს.

გამოცემის მიხედვით, 2 კვირის წინ აშშ-ს ოფიციალურმა პირებმა, ჰამას-ისრაელის ომის შეჩერების მიზნით, კატარელ კოლეგებს განუცხადეს, რომ მათ დედაქალაქ დოჰაში ჰამასის ლიდერებისთვის თავშესაფრის მიცემა უნდა შეეწყვიტათ. როგორც CNN ანონიმურ წყაროებზე დაყრდნობით წერს, კატარი წინადადებას დათანხმდა და ჰამასი ამის შესახებ 1 კვირის წინ გააფრთხილა.

"ჰამასი ტერორისტული დაჯგუფებაა, რომელმაც ამერიკელები დახოცა, ამერიკელი მძევლები ჯერ კიდევ რჩებიან მათ ტყვეობაში. მძევლების გათავისუფლების შესახებ არაერთი წინადადების უარყოფის შემდეგ, ჰამასის ლიდერებს აღარ უნდა ჰქონდეთ უფლება, იცხოვრონ აშშ-ს პარტნიორი ქვეყნის დედაქალაქში", — ამბობს ანონიმურმა ამერიკელმა მაღალჩინოსანმა.

როგორც CNN იუწყება, ამის საპასუხოდ ჰამასის ერთ-ერთმა ლიდერმა განაცხადა, რომ გავრცელებული ცნობები კატარის მიერ ჰამასის მაღალჩინოსნების ქვეყნიდან გაყრაზე დათანხმების შესახებ უსაფუძვლო და აშშ-ს მხრიდან წნეხის უბრალო ტაქტიკაა.

კატარი ერთ-ერთი მთავარი აქტორია ისრაელსა და ჰამასს შორის ცეცხლის შეწყვეტის შეთანხმებაზე მოლაპარაკებებში, რადგან ჰამასის ლიდერები დიდი ხანია, სწორედ დოჰაში ცხოვრობენ. ამ მიზეზით, მხარეებს შორის მოლაპარაკების პროცესები სწორედ კატარის დედაქალაქში იმართება.

აშშ-ს სახელმწიფო მდივანმა, ენტონი ბლინკენმა ზაფხულში ასევე მოუწოდა კატარს, ჰამასი გაეფრთხილებინა, რომ თუ დაჯგუფება ღაზაში ომის დასრულებაზე შეთავაზებულ ზავს არ დათანხმდებოდა, დოჰას დატოვება მოუწევდა.