ბორჯომში, წაღვერის ტყეში, სოფელ დაბის მიმდებარე ტერიტორიაზე უკვე 7 საათზე მეტია რაც ხანძარია. როგორც On.ge-ს საგანგებო სიტუაციების მართვის სამსახურში უთხრეს, ადგილზე ამ დროისთვის 100-მდე მეხანძრე მაშველი მუშაობს ცეცხლის ლოკალიზებისთვის.

"ამ ტერიტორიაზე 2008 წლის ომის დროსაც იყო ხანძარი და ახლა გამხმარი ხეები იწვის. ცეცხლი დაახლოებით 4-5 ჰექტარ ფართობზეა მოდებული".

ადგილზე სასაზღვრო პოლიციის ვერტმფრენიც ცდილობდა ცეცხლის ჩაქრობას, თუმცა უშედეგოდ. დაღამების შემდეგ, ადგილზე ვერტმფრენმა მუშაობა დაასრულა.

"სახანძრო ტექნიკის შეყვანა პრაქტიკულად შეუძლებელია, ისეთ დამრეც ფერდობზეა ცეცხლი გავრცელებული, თავი რომ დავანებოთ იმას, რომ ტყეა და არ ხერხდება. ამიტომ, ქვეითად არიან ჩვენი მეხანძრე-მაშველები ადგილზე და ამ დრომდე მუშაობენ ხანძრის ჩაქრობას. გვაქვს დამატებითი ცეცხლმაქრი ხელსაწყოები, მიწებს მიაყრიან, ასევე სპეციალური მათრახებია, და კიდევ სხვა დამატებითი ხელსაწყოები. ზოგი მათგანი წყალზე უფრო ეფექტიანია" - განუცხადეს On.ge-ს საგანგებო სიტუაციების მართვის სამსახურში.

წაღვერის ტყეში ხანძარი დღეს, 20 აგვისტოს, შუადღისას გაჩნდა. ქარიანი ამინდის გამო ცეცხლი ტერიტორიაზე სწრაფად გავრცელდა. ეროვნული სატყეო სააგენტოს განცხადებით, ხანძრის გაჩენის სავარაუდო მიზეზად მაღალი ტემპერატურა და მოსახლეობის დაუდევრობა სახელდება.