საია-ს ხელმძღვანელის, ნონა ქურდოვანიძის თქმით, თბილისის საქალაქო სასამართლომ ახალგაზრდა იურისტთა ასოციაციის სარჩელი, რომელიც 26 ოქტომბრის საპარლამენტო არჩევნებზე ხმის ფარულობას უკავშირდებოდა, არ დააკმაყოფილა. ამის შესახებ მან სოციალურ ქსელში დაწერა. ქურდოვანიძე წერს, რომ იგივე სარჩელები არც სხვა ქალაქებში მდებარე სასამართლოების მოსამართლეებმა დააკმაყოფილეს.

"ახლახან დასრულდა საქალაქო სასამართლოში საიას სარჩელის განხილვა ხმის ფარულობის უფლებაზე. საქმე განიხილა გამოსაცდელ ვადაში მყოფმა, ახლახან დანიშნულმა მოსამართლემ. მას ჰქონდა შანსი, საზოგადოებისათვის დაებრუნებინა ხმის ფარულობის უფლება და სასამართლოს მიმართ ნდობა. მან ეს შანსი არ გამოიყენა. ეს შანსი არ გამოიყენეს არც სხვა ქალაქებში მდებარე სასამართლოების მოსამართლეებმა, რომლებმაც ანალოგიური საქმეები დღეს და გუშინ განიხილეს და არ დააკმაყოფილეს. რამდენიმე სასამართლოს გადაწყვეტილებას კიდევ ველოდებით.

სასამართლოს მიერ საქმის სრულყოფილად გამოკვლევის ინტერესი რომ არ არსებობდა, ეს თავიდანვე გამოჩნდა, როდესაც მოსამართლემ არ დააკმაყოფილა ჩვენი 2 მნიშვნელოვანი შუამდგომლობა — დაეთვალიერებინა შემთხვევითი შერჩევით უბნების დალუქული ბიულეტენები; საქმეში მესამე პირად ჩაერთო ცესკო.

ჯერ-ჯერობით შედარებით საინტერესოდ მიმდინარეობს მოვლენები თეთრიწყაროს სასამართლო სასამართლოში, სადაც ხვალ მოსამართლე ბიულეტენებს დაათვალიერებს და მარკერსაც შეამოწმებს", — წერს ნონა ქურდოვანიძემ.