საგარეო საქმეთა მინისტრი ილია დარჩიაშვილი ქართველ დიპლომატებს პროფესიულ დღეს ულოცავს. ამის შესახებ მინისტრმა სოციალურ ქსელში დაწერა. მისი განცხადებით, ეს არის დღე, როდესაც შესაძლებელია განსაკუთრებული დამოკიდებულება გამოხატოს იმ ადამიანების მიმართ, ვინც უმნიშვნელოვანეს როლს ასრულებენ საერთაშორისო ასპარეზზე ქვეყნის წარმოჩენაში.

"დღეს, თქვენ მნიშვნელოვან როლს თამაშობთ ხელისუფლების მიერ ეროვნულ ინტერესებზე დაფუძნებული საგარეო პოლიტიკის განხორციელებაში, სწორედ თქვენი პროაქტიული საქმიანობა გვეხმარება არსებული გეოპოლიტიკური გამოწვევების დაძლევაში და ქართველი ხალხისა და საქართველოს სახელმწიფოს გაცხადებული მიზნის - მშვიდობიანი გზით ქვეყნის გამთლიანების, საქართველოს ევროპული მომავლის უზრუნველყოფის და ქვეყნის შემდგომი განვითარების საქმეში.
სიმბოლურია, რომ ქართული დიპლომატიის პროფესიული დღე დიდი ქართველი საზოგადო მოღვაწის, სულხან-საბა ორბელიანის სახელს უკავშირდება - დიპლომატის, რომელმაც ევროპისკენ გზა ჯერ კიდევ სამი საუკუნის წინ გაკვალა. თანამედროვე საქართველოს ევროპული მისწრაფება სწორედ ამ ძალისხმევის ერთგვარი გაგრძელება და შედეგია. პროგრესი, რომელსაც ბოლო წლების განმავლობაში ამ მიმართულებით მივაღწიეთ, მათ შორის, ქართველი დიპლომატების თავდაუზოგავი შრომის შედეგია. მადლობა თქვენ ამ უდიდესი ძალისხმევისთვის.
ძვირფასო კოლეგებო, კიდევ ერთხელ გილოცავთ პროფესიულ დღეს და გისურვებთ შემდგომ წარმატებებს თქვენი ქვეყნის სამსახურში!", — წერს საგარეო საქმეთა მინისტრი.