დღეს ინტერნეტში გავრცელდა ინფორმაცია იმის შესახებ, რომ სამხრეთ კორეაში მცხოვრები ბლოგერი და ინფლუენსერი, სოფია კვინიკაძე საპარლამენტო არჩევნებზე ქართული ოცნების კომისიის წევრად მისი ნებართვის გარეშე აღმოჩნდა. ამის შესახებ ინფორმაცია ცესკოს ვებგვერდზეა განთავსებული.

როგორც მოგვიანებით თავად სოფია კვინიკაძემ განმარტა, მან მართლაც გამოთქვა სურვილი ყოფილიყო არჩევნებზე დამკვირვებელი, ამისათვის მან საელჩოს მიმართა.

ბოლო პერიოდში სოფია აქტიურადაა ჩართული საქართველოში მიმდინარე პოლიტიკურ პროცესებში, აკრიტიკებს ქართულ ოცნებას და მმართველი პარტიის მიერ მიღებულ რუსულ კანონს. როგორც თავად ამბობს, ამის მიუხედავად, ოცნებამ "მაინც გაბედა" და შესთავაზა, რომ მათი დამკვირვებელი ყოფილიყო, რაზეც სოფია კვინიკაძემ უარი თქვა. ამის მიუხედავად, ცესკო-ს სიაში ის მაინც წერია.

ამის შემდეგ ინფლუენსერმა გაავრცელა ცესკოსთან მიმოწერა, სადაც ითხოვს, რომ ამოიღონ ცესკო-ს სიიდან, სადაც წერია, რომ ის ქართული ოცნების წარმომადგენელია არჩევნებზე.

ცესკოს განმარტებით, "პარტიის წარმომადგენლად რეგისტრაციას უზრუნველყოფს პარტია" და ურჩევს სოფია კვინიკაძეს, რომ აღნიშნულ საკითხთან დაკავშირებით პარტიას, ან ცესკო-ს მიმართოს ოფიციალური ბმულის დახმარებით.

"აი, ეს არის ჩვენი და ამ პარტიის რეალობა. ჩამწერეს სიებში, როცა ჩემი თვალით ვნახე გაგზავნილი უარი კორეიდან (აქ საელჩოსგან მიიღეს ეს პასუხი). ასეთ ქვეყანაში გვინდა ცხოვრება?

დასკვნები თქვენ გააკეთეთ და არჩევანიც მაგის მიხედვით 26-ში", — წერს სოფია კვინიკაძე.