ეტლით ფარიკაობა პარასპორტის ერთ-ერთი ყველაზე ძველი და სანახაობრივი სახეობაა, რომელიც 1960 წელს პირველ პარალიმპიურ თამაშებზეც იყო წარმოდგენილი.

ტრადიციული ფარიკაობის მსგავსად, ეტლის ფარიკაობაც სწრაფი და დინამიკური პარასპორტია, სადაც საქართველოს გამორჩეული წარმომადგენლები ჰყავს.

ინფორმაციისთვის, საქართველოს ბანკი პარალიმპიური ნაკრების მხარდამჭერია.

ეტლით ფარიკაობა პარალიმპიურ თამაშებზე

პარალიმპიურ თამაშებზე ეტლით მოფარიკავეები ორ კლასიფიკაციაში ასპარეზობენ:

A კლასი: მოფარიკავეს აქვს ხერხემლის კარგი კონტროლი და ბალანსი;

B კლასი: მოფარიკავეს არ შეუძლია ფეხის მოძრაობა, დარღვეული აქვს ხერხემლის კონტროლი, არ აქვს ბალანსის შესაძლებლობა.

პარალიმპიადაზე, ტრადიციულად, გამორჩეულ შედეგებს აჩვენებენ ფრანგი (64 ოქროს მედალი), ჩინელი (34 ოქროს მედალი) და იტალიელი (26 ოქროს მედალი) ეტლით მოფარიკავეები.

პარალიმპიურ თამაშებში პარაფარიკაობაში მედალი 25 ქვეყნის წარმომადგენელს აქვს მოპოვებული, მათ შორისაა საქართველოც ერთი ვერცხლის მედლით.

ქართველები ეტლით ფარიკაობაში

საქართველოში ეტლით ფარიკაობის განვითარება 2013 წელს საქართველოს ფარიკაობის ფედერაციამ დაიწყო. ერთ-ერთი პირველი პარასპორტსმენი, ვინც ქართველმა გულშემატკივარმა ამ სახეობაში იხილა, ირმა ხეცურიანი იყო.

წელს, 2024 წლის პარალიმპიურ თამაშებზე, ეტლით ფარიკაობაში საქართველოს სწორედ ირმა ხეცურიანი და ნინო თიბილაშვილი წარადგენენ.

ირმა ხეცურიანი

ირმა ხეცურიანი აფხაზეთში დაიბადა. 6 წლის იყო, როცა აფხაზეთის ომის დროს მან და მისმა ოჯახმა მშობლიური ოჩამჩირე დატოვეს და საცხოვრებლად წყალტუბოში გადავიდნენ.

18 წლის ასაკში ირმას ხერხემალში კეთილთვისებიანი სიმსივნე აღმოუჩინეს. ოპერაციის ჩატარების შემდეგ ის ეტლით გადაადგილდება.

2013 წელს, 28 წლის ასაკში, ხეცურიანმა ვარჯიში ეტლით ფარიკაობაში დაიწყო, სადაც მრავალ წარმატებას მიაღწია. ირმა მსოფლიოსა და ევროპის ორგზის ჩემპიონია ინდივიდუალურ თუ გუნდურ ასპარეზობაში. ასევე, ის მსოფლიო თასის 21-გზის ოქროს მფლობელია.

2016-2018 წლებში ირმა საქართველოს საუკეთესო ქალ პარასპორტსმენად დასახელდა.

ხეცურიანმა რიოსა (2016) და ტოკიოს (2020) პარალიმპიურ თამაშებზე იასპარეზა, წელს კი ის პარალიმპიადაზე მესამედ წარადგენს საქართველოს.

სპორტის მიღმა ირმა ერთ-ერთი გამორჩეული პერსონაა, რომელიც ცდილობს საზოგადოებაში პარასპორტის ცნობადობის ამაღლებას და შშმ პირების ყოველდღიურ ცხოვრებაში ინტეგრაციას.

ნინო თიბილაშვილი

ნინო თიბილაშვილმა ეტლით ფარიკაობაში ვარჯიში 2016 წელს, 19 წლის ასაკში, მალხაზ მესხის ხელმძღვანელობით დაიწყო.

ნინომ პირველ წარმატებას 2017 წელს უნგრეთში გამართულ მსოფლიო თასზე მიაღწია, სადაც ბრინჯაოს მედალი მოიპოვა. ამის შემდეგ თიბილაშვილმა 23-წლამდელებს შორის გამართულ მსოფლიო ჩემპიონატსა და მსოფლიო თასში გაიმარჯვა, 2019 წელს კი დიდებში პირველად მოიპოვა ოქროს მედალი მსოფლიო თასზე.

ნინო მსოფლიო თასის, ევროპის ჩემპიონატისა და სხვა საერთაშორისო ტურნირების მრავალგზის ვერცხლის და ბრინჯაოს პრიზიორია.

ამასთან, ნინო თიბილაშვილი არის პირველი და ჯერჯერობით ერთადერთი ქალი პარამოფარიკავე საქართველოს ისტორიაში, რომელმაც პარალიმპიურ თამაშებზე ვერცხლის მედალი მოიპოვა. მან ეს 2020 წლის ტოკიოს პარალიმპიადაზე შეძლო.

ერთად ვუგულშემატკივროთ ქართველ პარალიმპიელებს 2024 წლის პარიზის პარალიმპიადაზე. იმისთვის, რომ არ გამოგრჩეთ საინტერესო ამბები პარიზის პარალიმპიადიდან, თვალი ადევნეთ საქართველოს ბანკს სოციალურ ქსელებში.