საქართველოს სახალხო დამცველი, ლევან იოსელიანი ევოლუშენის მოშიმშილე თანამშრომლებს შეხვდა — მან გაფიცული თანამშრომლებისგან მათი პრობლემებისა და კომპანიის უყურადღებობის შესახებ ისაუბრა და განმარტა, რომ მხარეებს შორის შეთანხმების მისაღწევად ქმედით ნაბიჯებს გადადგამს.

იოსელიანის თქმით, საქმე შრომით დისკრიმინაციას ეხება, რაზეც სახალხო დამცველის აპარატის უახლოეს მომავალში მიიღებს გადაწყვეტილებას.

"პროტესტის დაწყების პირველი დღიდან, საკუთარი ინიციატივით დავიწყეთ მათი საკითხის შესწავლა. რამდენიმე საჯარო განცხადებაც გამოვაქვეყნეთ, სადაც მოვუწოდეთ როგორც დამსაქმებელს, ისე შრომის ინსპექციას საკითხის მოგვარებისკენ. საქმე ეხება შრომით დისკრიმინაციას, პროტესტის ფორმის გამოხატვის შესაძლებლობას და ასე შემდეგ. განსაკუთრებით დისკრიმინაციის ნაწილში მალე მივიღებთ გადაწყვეტილებას. იცით, რომ უშუალო მედიაციას ვერ მოვახდენთ, ამის მანდატი არ გაგვაჩნია, მაგრამ ყველა ძალას ვიღონებთ, რომ მხარეებს შორის შეთანხმება მიღწეული იყოს. რა ინფორმაციაც გამიზიარეს, ისინი საუბრობენ ღირსების შემლახველ სამუშაო პირობებზე, დისკრიმინაციის სავარაუდო ფატებზე, ისეთი გარემოს შექმნაზეც საუბრობენ, სადაც თანამშრომლები შესაძლოა დაპირისპირებულები იყვნენ. ყველაფერს შესწავლა სჭირდება. ამის უფლებამოსილება გააჩნია შრომის ინსპექციას, ხოლო შესაძლო დისკრიმინაციაზე, ჩვენ აქტიურად ვმუშაობთ", — თქვა იოსელიანმა.

შეგახსენებთ, 12 ივლისს, ევოლუშენ ჯორჯიას თანამშრომლების ნაწილი, ხელფასების ზრდის და სამუშაო პირობების გაუმჯობესების მოთხოვნით გაიფიცა. 21 აგვისტოს ერთ-ერთმა გაფიცულმა თანამშრომელმა პროტესტის უკიდურეს ფორმას მიმართა და პირი ამოიკერა.

გაფიცვამდე, მაუწყებელმა გაავრცელა "სქრინშოთები" კომპანიის მენეჯერების სამუშაო ჩათიდან, სადაც ისინი თანამშრომლებს გარეგნობის გამო დასცინოდნენ და იყენებდნენ სექსისტურ, რასისტულ და დისკრიმინაციულ ენას.